Судьялар хотин-қизлар билан учрашди

Маълумки, фуқароларнинг мурожаатларини тинглаш, уларнинг муаммоларини ҳал этиш бугунги куннинг энг долзарб масалаларидан биридир. Шу мақсадда Қашқадарё вилоят маъмурий суди раиси вазифасини вақтинча бажарувчи Бахтиёр Қиличов ва Қарши туманлараро маъмурий суди судьяси Латофат Зайниддиновалар иштирокида Қамаши туманидаги “Аёллар дафтари”га киритилган хотин-қизлар билан учрашув ташкил этилди.

Учрашувда “Аёллар дафтари”га киритилган эҳтиёжманд хотин-қизларнинг мурожаатлари тингланиб, ҳуқуқий ёрдам ҳамда маслаҳатлар берилди. Шунингдек, уларнинг муаммолари ўрганилиб, ҳуқуқий ечимлари бўйича зарур чоралар белгиланди.

 

Қашқадарё вилоят суди жамоатчилик ва ОАВ билан алоқалар бўлими

Қашқадарё вилоят маъмурий судида “Маърифат соати” ташкил этилди

“Маърифат соати”да Қашқадарё вилоят маъмурий суди судьялари ва ходимлари иштирок этишди. Дастлаб, Қашқадарё вилоят маъмурий суди раиси вазифасини вақтинча бажарувчи Бахтиёр Қиличовнинг кун тартибидаги Ўзбекистон Республикаси Уй-жой Кодексига киритилган ўзгартириш ва қўшимчалар юзасидан маърузаси ҳамда Қашқадарё вилоят маъмурий судининг 2022 йилга мўлжалланган иш режасининг 1.5 банди ижроси, 2022 йилнинг иккинчи ярим йиллиги давомида судьялар ва суд ходимларининг ижтимоий-сиёсий билим даражасини ошириш, Ўзбекистон Республикаси Конституциясига киритилаётган ўзгартириш ҳамда суд-ҳуқуқ соҳасидаги ислоҳотлар юзасидан фикр-мулоҳазалари тингланди.

Сўнгра, “Маърифат соати”га таклиф этилган меҳмон билан давра суҳбати ўтказилди. Қашқадарё вилоят маданият бошқармаси бошлиғи, Ўзбекистон Республикаси санъат арбоби Исоқ Тўраев иштирокида ташкил этилган суҳбат мавзуси “Ўзбек санъати: кеча ва бугун” деб номланди.

Қизғин тарзда кечган суҳбат давомида иштирокчилар ўзларини қизиқтирган саволларга жавоб олишди.

 

Қашқадарё вилоят суди жамоатчилик ва ОАВ билан алоқалар бўлими

Жиноят ишлари бўйича Кўкдала туман судининг сайёр мажлиси ўтказилди

Жиноят ишлари бўйича Кўкдала туман судининг очиқ сайёр суд мажлиси бўлиб ўтди. Унда маъмурий хуқуқбузарликларга оид жами 26 та иш кўриб чиқилди.

Жумладан 7 та маъмурий ишларга жарима жазоси тайинланди, 2 та шахсларга нисбатан маъмурий қамоқ жазоси тайинланди.

Шу жумладан 17 та маъмурий иш тарафларнинг ўзаро ярашганлиги муносабати билан МЖтКнинг 212-моддасига асосан тугатилди ҳамда фуқароларга янги жорий қилинган МЖтКнинг 212-моддаси ҳақида тушунчалар берилиб, келгусида маъмурий хуқуқбузарлик келтириб чиқариш қандай оқибатларга олиб келиши тушунтирилди. Уларнинг оила аъзоларига ҳам келгусида содир этилиши мумкин бўлган жиноятчилик ва ҳуқуқбузарликларнинг олдини олиш мақсадида тушунтиришлар берилди.

Тадбир сўнггида жиноят ишлари бўйича Кўкдала туман суди раиси Ўктам Расулов томонидан мазкур ҳудуд маҳалла фаоллари ва кенг жамоатчилик вакилларига улар истиқомат қилаётган маҳаллада жиноятчилик ва ҳуқуқбузарликларнинг олдини олиш юзасидан бир қатор ҳуқуқий тушунчалар берилди. Очиқ мулоқот ўтказилиб, аҳолини қизиқтирган саволларга тўлиқ жавоблар берилди.

 

Қашқадарё вилоят суди жамоатчилик ва ОАВ билан алоқалар бўлими

«Суғурта муносабатларидан келиб чиқадиган низолар» мавзусида семинар ташкил этилди

Маълумки, иқтисодий судларда суғурта муносабатларидан келиб чиқадиган низолар билан боғлиқ ишларни кўриб чиқишда бир қатор муаммоларга кўп бора дуч келинади. Шу сабабли бундай муаммоларга ечим излаш муҳим масала. Шу максадида Шаҳрисабз туманлараро иқтисодий судининг судяьси О.Қурбонов томонидан «Микрокредитбанк» Шаҳрисабз туман филиали биносида «Суғурта муносабатларидан келиб чиқадиган низолар»  мавзусида семинар ташкил этилди.

Унда банк ва мутасадди ташкилотлар ходимлари иштирок этишди. Семинар машгулоти иштирокчиларига суғурта муносабатларидан келиб чиқадиган низоларни судда куриб чикишнинг  муаммоли тарафлари ва уларнинг ечимлари бўйича тушунтиришлар берилди. Иштирокчилар ўзларини қизиқтирган саволларга жавоб олишди.

 

Қашқадарё вилоят суди жамоатчилик ва ОАВ билан алоқалар бўлими

Оила мустаҳкамлиги – жамият мустаҳкамлигини таъминлайди

Жамиятимизда фарзандларни баркамол авлод қилиб етказувчи мўжаз маскан бу оиладир. Шу туфайли қонун талаблари асосида тузилган никоҳдан давлат манфаатдор бўлиб, ундан ажралиш жамият манфаатларига салбий таъсир кўрсатади. Оилада, оилавий муносабатлар тўғри йўлга қўйилган бўлса, унинг шунчалик мустаҳкам бўлиши, бу ўз натижасида, жамиятнинг ҳам мустаҳкамланишига ўз таъсирини кўрсатиши амалиётда синовдан ўтган омилдир.

Мамлакатимизда оила институтини мустаҳкамлаш, оналик ва болаликни ҳар томонлама қўллаб-қувватлаш, хотин-қизларнинг ижтимоий-сиёсий ва социал фаоллигини ошириш, уларнинг ҳуқуқ ва қонуний манфаатларига сўзсиз риоя қилинишини таъминлашга қаратилган тизимли саъй-ҳаракатлар амалга оширилмоқда.

Амалдаги Оила кодексида никоҳ тушунчасига таъриф берилмайди. Шунга кўра мазкур тушунчанинг таърифини никоҳнинг ҳуқуқий табиати, қонунчиликда унга нисбатан белгиланган қоидалар ҳамма эркак ва аёлнинг ўзаро истак хоҳиши натижаси сифатидаги келишувдан келиб чиқади.

Ислом ҳуқуқида ҳам никоҳга монеълик қиладиган ҳолатларнинг олдини олиш нуқтаи назаридан никоҳга киришувчи шахсларга нисбатан белгиланган шартлар исломнинг классик манбаларидан Ҳидоя, Фатовои Қозихон китобларида келтирилган.

Бугунги кунда биз оилани қанчалик даражада муқаддас деб билмайлик, давлатимиз томонидан оилани мустаҳкамлаш йўлида, ажримларнинг олдини олиш мақсадида бир қатор чора тадбирлар амалга оширилган ва оширилаётганлигига қарамасдан афсуски ажралишлар сони юқорилигича қолмоқда.

Оила ҳақида сўз борар экан, бегуноҳ фарзандлар тақдири кишини беихтиёр ташвишга солади. Негаки, ота-онанинг айро яшашидан мурғак фарзандлар ҳаммадан кўп азият чекади.

Суд амалиётидаги таҳлиллар шуни кўрсатмоқдаки,
2022 йилнинг 1-ярмида никоҳдан ажратиш ҳақида кўрилган фуқаролик ишлари статистикасига қараганда, судларга 2166 та даъво аризалар кўрилган.

Шундан, 1215 та оилаларни яраштириш чоралари кўрилишига қарамай оила барбод бўлган ва никоҳдан ажратилган. 829 та оилани ярашиб кетишига имкони бўлганлиги сабабли даъво талаблари рад этилган ва кўрмасдан қолдирилган.

Бундан ташқари, 122 та оила фуқаролик ишлари бўйича судларнинг ташаббуси билан яраштирилиб, иш юритиш тугатилган ҳамда ҳозирги кунда улар биргаликда бахтли оила бўлиб яшаб келмоқда.

Қашқадарё вилоят суди фуқаролик ишлари бўйича судлов ҳайъати томонидан ўрганишлар ўтказилиши давомида никоҳдан ажратиш сабаблари таҳлил қилинганида, оилада моддий етишмовчилик, спиртли ичимликлар истеъмол қилиш, фарзандсизлик, эр-хотиннинг бир-бири билан муросалари тўғри келмаслиги, уларнинг кўп йиллар мобайнида бирга яшамаслиги, эр-хотиндан бирининг бетоб бўлиб қолганлиги сабаблари кўплаб қайд этилган. Шунингдек никоҳдан ажратишнинг бошқа сабабларида аксарияти тарафларнинг ўзаро ишончни йўқотганлиги, ўртада учинчи шахсларнинг аралашуви сабаблари ҳам кўплаб учрайди.

Фуқаролар томонидан оила ва никоҳ муносабатларига киришиш, соҳага оид қонун ҳужжатлари орқали уларга берилган ҳуқуқ ва мажбуриятлардан, имтиёзлардан фойдаланиш, бузилган ҳуқуқни ҳимоя қилиш борасида, судьялар, прокуратура, ички ишлар органлари, оила ва хотин-қизлар, адлия, маҳалла ва нуронийларни қўллаб-қувватлаш, тиббиёт, халқ таълими бўлимлари, мусулмонлар идораси ва аҳоли бандлигига кўмаклашиш марказлари билан ҳамкорлик дастури ишлаб чиқилиб, амалиётга жорий қилинди.

 

Баҳодир Азизов, Қашқадарё вилоят суди фуқаролик ишлари бўйича судьяси

ДИҚҚАТ, ТАНЛОВ!

Қашқадарё вилоят, туман, шаҳар ва туманлараро судларининг қуйидаги бўш иш ўринларига танлов эълон қилинади:
– Қашқадарё вилоят судининг судья катта ёрдамчисига 2 нафар, (Қашқадарё вилоят суди Раёсатининг 2022 йил 22 январдаги РС-2-22-сонли қарорига кўра қуйи судда камида 1 йиллик узлуксиз меҳнат стажига эга бўлган)
– Жиноят ишлари бўйича Косон туман судининг девонхона мудири вазифасига 1 нафар,
– Фуқаролик ишлари бўйича Яккабоғ туманлараро судининг судья ёрдамчиси вазифасига 1 нафар,
– Фуқаролик ишлари бўйича Қарши туманлараро судининг судья ёрдамчиси вазифасига 1 нафар,
– Фуқаролик ишлари бўйича Касби туманлараро судининг судья ёрдамчиси вазифасига 1 нафар,
– Фуқаролик ишлари бўйича Чироқчи туманлараро судининг архив мудири вазифасига 1 нафар,
– Фуқаролик ишлари бўйича Шаҳрисабз туманлараро судининг архив мудири вазифасига 1 нафар.
Танловда олий юридик маълумотли, Ўзбекистон Республикаси фуқароси бўлган шахслар қатнашиши мумкин.
Номзодлар очиқлик, шаффофлик, тенглик принциплари асосида Комиссия томонидан белгиланган тартибда суҳбатдан ўтказилади.

Аризалар 2022 йил 19 сентябр соат 17:00 га қадар қабул қилинади.
Мурожаат учун тел: (75) 221-05-58.
Электрон почта манзили jib.qash.mh@sud.uz
Манзил: Қашқадарё вилоят суди (180108, Қарши шаҳри Бунёдкорлик кўчаси 10 А уй)

Коррупция – хавфли иллат

Фуқароларнинг билимсизлиги, ижтимоий нофаоллиги, сиёсий ва иқтисодий талаблар моҳиятини тушунмаслиги, энг асосийси, қонунлардан бехабарлиги, шунингдек, бепарволик, эътиборсизлик иллатлари коррупцияни пайдо қилади, истайсизми-йўқми, ҳаётнинг ҳар бир жабҳасида катта-кичик коррупция аломатларига дуч келасиз.

Шу сабабли, коррупцияга қарши курашишда аҳолининг, айниқса, ёшларнинг ҳуқуқий онги ва ҳуқуқий маданиятини юксалтириш, ҳуқуқий таълим ва тарбияни кучайтириш, жамиятда коррупцияга нисбатан муросасиз муносабатни шакллантириш, мунтазам равишда ҳуқуқий тарғиботлар ўтказилган ҳолда коррупциянинг оқибатларини ҳаётий мисоллар ва таъсирчан воситалар орқали тушунтириш бугунги куннинг асосий вазифаси ҳисобланади.

Коррупцияга қарши курашишда, соҳага оид қонун ҳужжатлари ижросини таъминлашда давлат органлари билан нодавлат нотижорат ташкилотлари ва фуқаролик жамияти институтлари билан ҳамкорликни кучайтириш долзарб аҳамиятга эга. Асосий вазифамиз аҳолида коррупция иллатига нисбатан муросасиз муносабатни қарор топтириш туйғусини шакллантиришдан иборат.

Коррупциявий жиноятлар таҳлили қуйидаги ишларни самарали олиб бориш орқали бу “иллат”ни олдини олиш мумкинлигини кўрсатмоқда.

Биринчи навбатда, фуқароларимиз онгида ҳуқуқий тизимнинг турли соҳалари (ҳуқуқ ижодкорлиги, ҳуқуқий амалиёт, суд, суд жараёни, жазо тайинлаш, адлия органлари хизмати, прокуратура, ички ишлар тизими) ҳақида аниқ тушунчаларни сингдириш, уларга етказиш, очиқлаш лозим ва уларда тўлиқ ва аниқ тушунчалар бўлиши даркор.

Бежизга, “Коррупцияга қарши курашиш тўғрисида”ги Қонуннинг 5-моддасида, аҳолининг ҳуқуқий онги ва ҳуқуқий маданиятини юксалтириш, жамиятда коррупцияга нисбатан муросасиз муносабатни шакллантириш – коррупцияга қарши курашиш соҳасидаги давлат сиёсатининг асосий йўналишидан бири деб белгиланмаган.

Давлат идораларида касбий маҳоратни ошириш, коррупция ва хизмат мавқеини суиистеъмол қилиш ҳолатларининг олдини олишга қаратилган доимий равишдаги ходимлар билан ишлашни йўлга қўйиш орқали давлат бошқарувининг самарадорлигига эришиш мумкин. Бундан ташқари, давлат хизматчиларини ўқитиш мехнизмини ташкил қилиш ҳам алоҳида аҳамият касб этади.

Жумладан, “Коррупцияга қарши курашиш тўғрисида”ги давлат дастурининг 4-бандида, таълим муассасаларининг ўқув дастурларига коррупцияга қарши курашиш махсус курсларини киритиш назарда тутилган.

Бу жараёнда, давлат хизматчиси беғараз, мустақил, ҳалол ва сотилмайдиган, ҳақиқатпарвар, сезгир, кишиларга қайғурадиган, яъни инсонпарвар бўлиши, ўзининг шахсий манфаатларини жамоатчилик манфаатлари билан мослаштириб бориш, шунингдек меҳнатсеварлик, пунктуаллик, хушмомалалик, чуқур мулоҳазалик, тинглай олиш, беғараз ёрдам, буйруқ ва кўрсатмаларни ўз вақтида бажариш, ҳақгўйлик, аниқлик, адолатли қарор чиқариш, шахсан ўзи ёки яқин қариндошлари, таниш-билишлари, яқин ёки ишбилармонлик муносабатларида бўладиган бошқа шахслар учун ҳар қандай наф кўриш ёки афзалликларга эга бўлишни ўз ичига оладиган манфаатлар тўқнашувига сабаб бўладиган шахсий манфаатдорлик ҳолатларига йўл қўймаслик каби фазилатларини сингдиришга алоҳида эътибор қаратиш лозим. Шу билан бирга давлат хизматчиларида айнан аҳлоқий иммунитетни шакллантириш ҳам коррупциянинг олдини олишнинг асосий мезони ҳисобланади.

 

Ҳамид Бобоқулов, Қашқадарё вилоят суди жиноят ишлари бўйича судьяси

Судьяларнинг аҳоли билан очиқ мулоқотлари давом этмоқда

Маълумки, оилалар ва маҳаллалардаги ижтимоий-маънавий муҳитга салбий таъсир кўрсатувчи омилларнинг сабаб ва шарт-шароитларини аниқлаш ҳамда бартараф этишга қаратилган чора-тадбирларни амалга ошириш, фуқароларнинг ўзини-ўзи бошқариш органларида жамоат тартиби ва хавфсизлигини таъминлаш, ҳуқуқбузарликларнинг барвақт олдини олиш, шу жумладан, хотин-қизлар ҳуқуқбузарлиги профилактикаси, вояга етмаганлар ўртасида назоратсизлик ҳамда ҳуқуқбузарликларга доир ишларда ва уларнинг ҳуқуқларини ҳимоя қилишда ҳуқуқни муҳофаза қилувчи органлар билан ўзаро ҳамкорликни мустаҳкамлашга кўмаклашишда  фуқароларнинг ўзини ўзи бошқариш органларининг давлат органлари ҳамда фуқаролик жамияти институтлари билан яқин ҳамкорлиги муҳим ўрин тутади.

Қашқадарё вилоят суди судьяларининг аҳоли билан ўтказиб келаётган очиқ мулоқотлари 2022 йил 25 август куни Қарши шаҳридаги “Ишга марҳамат” моно марказида давом этди.

Шу куни Қашқадарё вилоят судининг жиноят ишлари бўйича судьялари Ш.Бахтиёров, Ф.Қамбарова, А.Ғаппоров ва Н.Абдуллаевлар Қарши шаҳридаги “Ойдин” ва “Пахтазор-1” МФЙ фуқаролари ва моно марказда иш ўрганадиган тингловчиларга жиноятчилик ва ҳуқуқбузарликка қарши кураш, фирибгарлик, одам савдоси ва гиёҳвандлик воситалари билан қонунга хилоф равишда муомала қилиш жиноятлари, жазо турлари ҳақида маърузалар қилишди.

Бундан ташқари, Жиноят ишлари бўйича Қарши шаҳар суди судьяси Б.Умиров томонидан бир қатор жиноят ишлари очиқ сайёр суд мажлисида кўрилиб, суд ҳукмлари ва хусусий ажримлар муҳокамаси ўтказилди.

Учрашувда суд-ҳуқуқ соҳасида олиб борилаётган ислоҳотлар, ушбу ислоҳотларнинг асл мақсади аҳолининг одил судловга бўлган ишончини ошириш, жамиятда қонун устуворлигини таъминлаш ва қонунийликни мустаҳкамлаш эканлиги ҳамда муҳим сиёсий жараён – Конституциявий ислоҳотлар ҳақида маълумотлар берилди.

Шунингдек, жиноятчилик ва ҳуқуқбузарликнинг барвақт олдини олиш, аҳолининг ҳуқуқий маданиятини ошириш, вояга етмаганлар ва ёшларни Ватанга муҳаббат, ватанпарварлик, миллий ва умуминсоний қадриятларга ҳурмат руҳида тарбиялаш бўйича ўз фикрларини билдирдилар.

Очиқ мулоқотда фуқаролар томонидан турли мавзуларда берилган саволларга жавоблар ва тушунтиришлар берилди, айрим масалалар тегишли сектор раҳбари эътиборига етказилиши маълум қилинди.

 

 

Қашқадарё вилоят суди жамоатчилик ва ОАВ билан алоқалар бўлими

“Терроризм” жинояти тушунчаси ва мазкур жиноят учун тайинланадиган жазо турлари

“Террор” атамаси лотинчадан таржимада “қўрқув”, “даҳшат” деган маънони англатади. Терроризм эса террор сиёсати ва амалиётининг қўлланиши, яъни сиёсий рақибларни бартараф этиш мақсадида жисмоний зўрлик ишлатиш, уларни жисмонан йўқ қилиб ташлаш, ўлдириш маҳсулидир.

Бугунги кунда терроризм алоҳида бир мамлакат доирасидагина амалга оширилаётгани йўқ, у бир давлат ҳудудидан ташқарига чиқмоқда ва халқаро терроризм деб номланган ҳодисага айланмоқда. Халқаро терроризм – бу халқаро миқёсда содир этиладиган, одамларнинг беҳуда ҳалок бўлиши, шаҳарларнинг бузилиши, давлатларнинг вайрон бўлиши, улар иқтисодий ривожланиш даражасининг пасайиши ва ҳоказоларга сабаб бўладиган ижтимоий хавфли қилмишлар йиғиндисидир.

Терроризмга қарши курашни кучайтириш бўйича аксарият мамлакатларда кўп томонлама конвенциялар ва қонунлар қабул қилинди. Жумладан, Ўзбекистон Республикасида “Терроризмга қарши кураш тўғрисида” махсус қонун қабул қилинди (2000 йил 15 декабрь).

Қонунда давлат органларининг терроризмга қарши кураш соҳасидаги ваколатлари, террорчиликка қарши операциянинг ўтказилиши, террорчилик ҳаракати оқибатида етказилган зарарни қоплаш ва жабрланган шахсларнинг ижтимоий реабилитацияси, терроризмга қарши курашда иштирок этаётган шахсларнинг ҳуқуқий ва ижтимоий ҳимояси, террорчилик фаолиятида иштирок этганлик ҳамда терроризмга қарши кураш тўғрисидаги қонунчиликни бузганлик учун жавобгарлик каби масалалар ҳуқуқий асослаб берилган.

Шунингдек, террорчилик ҳаракатларига қарши халқаро даражада курашиш учун БМТ Хавфсизлик Кенгашининг 2001 йил 28 сентябрда қабул қилинган 1375-сон Резолюцияси ҳам алоҳида аҳамият касб этади. Хусусан, мазкур ҳужжатда терроризмни қўллаш амалиёти қораланган ва тақиқланган, давлатларнинг ушбу ижтимоий хавфли ҳодисага қарши курашишга бўлган иродаси мустаҳкамланган.

Халқаро ҳуқуқда терроризмга қарши курашишга йўналтирилган қатор конвенциялар мавжуд. Масалан, Терроризмни йўқ қилиш ҳақидаги Европа Конвенцияси (Страсбург, 1977 йил 27 январь), Мустақил Давлатлар Ҳамдўстлиги давлатлари иштирокчиларининг терроризмга қарши курашиш бўйича ҳамкорлиги ҳақидаги шартномаси (Минск, 1999 йил 4 июнь), Бомбани қўллаш билан боғлиқ терроризмга қарши кураш тўғрисидаги халқаро конвенция (Нью-Йорк, 1997 йил 15 декабрь), Терроризм, сепаратизм ва экстремизмга қарши кураш тўғрисидаги Шанхай конвенцияси (Шанхай, 2001 йил 15 июнь) ва ҳ.к.

Терроризм жиноий ҳаракатнинг энг оғир кўринишларидан бири бўлиб, айбдор атрофдагиларда қўрқув, ғалаён уйғотишга, уларнинг меъёрий одати ва ижтимоий фойдали фаолиятини тўхтатиб қўйишга, ҳокимият ва бошқарув органларига қаршилик қилиб, ўзининг ноқонуний мақсадларига эришишга ҳаракат қилади.

Ўзбекистон Республикаси Жиноят кодексининг 155-моддасига мувофиқ, Терроризм – халқаро муносабатларни мураккаблаштириш, давлатнинг суверенитетини, ҳудудий яҳлитлигини бузиш, хавфсизлигига путур етказиш, уруш ва қуролли можаролар чиқариш, ижтимоий-сиёсий вазиятни беқарорлаштириш, аҳолини қўрқитиш мақсадида давлат органини, халқаро ташкилотни, уларнинг мансабдор шахсларини, жисмоний ёки юридик шахсни бирон бир фаолиятни амалга оширишга ёки амалга оширишдан тийилишга мажбур қилиш учун зўрлик, куч ишлатиш, шахс ёки мол-мулкка хавф туғдирувчи бошқа қилмишлар ёхуд уларни амалга ошириш таҳдиди билан содир этилса – саккиз йилдан ўн йилгача озодликдан маҳрум қилиш билан жазоланади;

-вазиятни беқарорлаштириш ёки давлат органлари томонидан қарор қабул қилинишига таъсир кўрсатиш ёхуд сиёсий ёки бошқа ижтимоий фаолиятга тўсқинлик қилиш мақсадида давлат ёки жамоат арбоби ёхуд ҳокимият вакилининг давлат ёки жамоатчилик фаолияти муносабати билан унинг ҳаётига суиқасд қилиш ёки унинг баданига шикаст етказиш – ўн йилдан ўн беш йилгача озодликдан маҳрум қилиш билан жазоланади;

-ушбу ҳаракатлар одам ўлишига ёки бошқа оғир оқибатларнинг келиб чиқишига сабаб бўлса – ўн беш йилдан йигирма беш йилгача озодликдан маҳрум қилиш ёки умрбод озодликдан маҳрум қилиш билан жазоланади.

Терроризмни тайёрлашда иштирок этган шахс, агар у ҳокимият органларига ўз вақтида хабар бериш ёки бошқа усул билан оғир оқибатлар юзага келишининг ҳамда террорчилар мақсадлари амалга оширилишининг олдини олишга фаол кўмаклашган бўлса, башарти бу шахснинг ҳаракатларида жиноятнинг бошқа таркиби бўлмаса, жиноий жавобгарликдан озод этилади.

 

Анвар Элмуродов, Қашқадарё вилоят судининг жиноят ишлари бўйича судьяси    

ДИҚҚАТ, ТАНЛОВ!

Қашқадарё вилоят, туман, шаҳар ва туманлараро судларининг қуйидаги бўш иш ўринларига танлов эълон қилинади:

– Жиноят ишлари бўйича Касби туман судининг судья ёрдамчиси вазифасига 1 нафар;

– Жиноят ишлари бўйича Чироқчи туман судининг судья ёрдамчиси вазифасига 1 нафар;

– Жиноят ишлари бўйича Косон туман судининг девонхона мудири вазифасига 1 нафар;

– Касби туманлараро иқтисодий судининг судья ёрдамчиси вазифасига 1 нафар;

– Фуқаролик ишлари бўйича Яккабоғ туманлараро судининг судья ёрдамчиси вазифасига 1 нафар;

– Фуқаролик ишлари бўйича Қарши туманлараро судининг судья ёрдамчиси вазифасига 2 нафар.

Танловда олий юридик маълумотли, Ўзбекистон Республикаси фуқароси бўлган шахслар қатнашиши мумкин.

Номзодлар очиқлик, шаффофлик, тенглик принциплари асосида Комиссия томонидан белгиланган тартибда суҳбатдан ўтказилади.

 

Аризалар 2022 йил 12 август соат 17:00 га қадар қабул қилинади.

Мурожаат учун тел: (75) 221-05–58.

Электрон почта манзили: jib.qash.mh@sud.uz

Манзил:  Қашқадарё вилоят суди (180108, Қарши шаҳри Бунёдкорлик кўчаси 10a уй)

Skip to content