МАСЪУЛИЯТСИЗ ОТА

Бугун жиноят ишлари бўйича Қарши шаҳар судида ўз фарзандининг моддий  таъминотидан бўйин товлаган отага нисбатан маъмурий иш кўриб чиқилди. У вояга етмаган уч нафар фарзандини боқишдан бош тортди. Натижада суд қарори билан унга ўн беш сутка маъмурий қамоқ жазоси тайинланди…

Сиртдан қараганда масала ўз ечимини топгандек, муаммога нуқта қўйилгандек бўлиб туюлади. Аммо, ҳақиқатдан ҳам шундаймикин? Ўйлаб қоласан киши: “Нима бўляпти одамларга? Ориятни қаёққа қўйдик? Бизнинг ўзбек йигитлари учун, айниқса бу гап ўлимдан оғир эмасми?..”

Ахир, ота-боболаримиз тарихда, ўзининг болалари билан бир сафда минг-минглаб етим-есирларнинг бошини силагани учун ҳам ҳозиргача болажон халқ сифатида улуғланиб келади-ку! Бу бўлса ўз пушти-камаридан тўраган, наслининг давомчиси бўлган болаларни боқишдан бош тортаяпти – мантиқ қани?! Қизиғи шундаки, фарзандлари ўзиники эканини инкор этмаяпти, тўлов қобилияти ҳам бор, фақат тўламоқчи эмас. Нега? Майиб-мажруҳ, ногирон-нотавон бўлса эди, балки тушуниш мумкин бўларди. Аммо, соппа-соғ, бардам-бақувват. Судга кела туриб ҳам қайсидир ошхонада зиғир мойига қилинган ошдан бўккан бўлса керак, устига-устак, ҳазми таом деб, бижиллоқ ичимликлардан симиргани кекириб қўйишларидан сезилиб турибди. Ўз нафси, қорни учун пул аямаслиги аён, аммо уч нафар қизалоғи учун бир чақа ҳам бермоқчи эмас.

Алимент ундириш учун арз қилган онанинг қаватида турган уч ёшли қизалоқ, отасини кўриб унга томон талпинди. Бу ерда бўлаётган гап-сўзларни ҳали англаш ёшида эмас – шунисига ҳам шукур! Дадажон, деб бориб отасининг оёғини қучди. Атрофдаги кишиларнинг беихтиёр кўзлари ёшланди. Ҳақиқатдан ҳам таъсирчан  ҳолат! Мана шу даъватнинг ўзи ҳар қандай тошбағир одамнинг ҳам дийдасини юмшатади, аммо бунга кор қилмади. Бисотининг бир бўлагини боласига бериб, уни бахтиёр қилишдан ўн беш сутка ўтириб чиқишни афзал билди…

Мен башоратчи эмасман. Нарса ва ҳодисаларнинг нима бўлишини олдиндан айтиш қобилиятим йўқ. Лекин, катта ҳаётий тажрибам, суддаги фаолиятим давомида тўплаган кўникмаларимга таяниб бир нарсани аниқ айтишим мумкин. Бунинг каби кишилар учун ўн беш суткалик қамоқ жазоси – санаторияда дам олиш билан тенг тушунча. Аммо, охират бор олдда: унинг оғушида ором бўлмайди, мана шу норасидаларга етказган азоблари учун охиратнинг оқибати оғриқли кечади. Бу ҳақда мустақил ҳаётга – оила остонасига қадам қўяётган ҳар бир йигит-қиз жиддий ўйлаб кўриши лозим.

 

Шаҳриддин Эшимов, жиноят ишлари бўйича Қарши шаҳар судининг судьяси  

ДИҚҚАТ, ТАНЛОВ!

Қашқадарё вилоят, туман, шаҳар ва туманлараро судларининг қуйидаги бўш иш ўринларига танлов эълон қилинади:

– Қашқадарё вилоят судининг катта консультант вазифасига 1 нафар, (Қашқадарё вилоят суди Раёсатининг 2022 йил 22 январдаги РС-2-22-сонли қарорига кўра қуйи судда камида 1 йиллик узлуксиз меҳнат стажига эга бўлиш талаб этилади)

– Жиноят ишлари бўйича Қарши шаҳар судининг судья ёрдамчиси вазифасига 1 нафар;

– Фуқаролик ишлари бўйича Қарши туманлараро судининг судья ёрдамчиси вазифасига 2 нафар;

Танловда олий юридик маълумотли, Ўзбекистон Республикаси фуқароси бўлган шахслар қатнашиши мумкин.

Номзодлар очиқлик, шаффофлик, тенглик принциплари асосида Комиссия томонидан белгиланган тартибда суҳбатдан ўтказилади.

 

Аризалар 2022 йил 25 май, соат 17:00 га қадар қабул қилинади.

Мурожаат учун тел: (75) 221-05–58.

Электрон почта манзили jib.qash.mh@sud.uz

Манзил:  Қашқадарё вилоят суди (180108, Қарши шаҳри Бунёдкорлик кўчаси 10a уй)

Деҳқонобод туманида судлар томонидан суд-ҳуқуқ масалалари бўйича сайёр қабул ташкил этилди

Деҳқонобод туманида судлар томонидан туманнинг «Янги ҳаёт» маҳалла фуқаролар йиғинида аҳолининг суд-ҳуқуқ масалалари билан боғлиқ муаммоларини ўрганиш ва унга ечим излашга қаратилган сайёр қабул ташкил этилди. Дастлаб суд раислари бугунги кунда мамлакатимиз суд-ҳуқуқ тизимидаги сўнгги янгилик ва ўзгаришлар ҳақида, шунингдек, мазкур сайёр қабулни ташкил этишдан кўзланган мақсад ҳақида йиғилганларга батафсил тушунчалар беришди.

Қабул давомида суд-ҳуқуқ масалалари бўйича мурожаат қилган жисмоний ва юридик шахсларнинг мурожаатлари тингланди ва  16 нафар фуқароларга белгиланган тартибда ҳуқуқий тушунтиришлар берилди. Қашқадарё вилоят судлари масъуллари томонидан аҳолининг суд-ҳуқуқ соҳасидаги муаммоларини ўрганиш ва ҳал қилишга қаратилган сайёр қабуллар ўтказиш бўйича алоҳида дастур ишлаб чиқилган бўлиб, унинг ижросини таъминлаш мақсадида изчил ишлар давом эттирилмоқда.

 

Қашқадарё вилоят суди жамоатчилик ва ОАВ билан алоқалар бўлими

Ўзбекистон Республикаси Олий суди раиси Козимжон Комилов Қашқадарёда ер эгалари билан учрашди

Маълумки, 2021 йил 23 ноябрда Ўзбекистон Республикаси Президентининг “Мева-сабзавотчилик ва узумчиликда оилавий тадбиркорликни ривожлантириш, қишлоқ ҳўжалиги ишлаб чиқаришда дехқон хўжаликларининг улушини ошириш чора-тадбирлари тўғрисида”ги Қарори қабул қилинди. Қарорга мувофиқ Қашқадарё вилоятида 2022 йил давомида 10 минг 234 гектар ер майдони электрон танлов асосида ғолиб бўлган фуқароларга топширилиши кўзда тутилган. Ушбу ерлар аҳолига деҳқон хўжалиги ташкил этиш учун, 10 сотихдан 1 гектаргача 10 йил муддатга, очиқ электрон танлов ўтказиш орқали ижарага берилмоқда. Бунда, асосий мезон – ердан самарали фойдаланиш ва яратиладиган иш ўринлари этиб белгиланди.

Ўзбекистон Республикаси Олий суди раиси Козимжон Комилов Қашқадарёлик қишлоқ хўжалиги маҳсулотларини етиштириш учун ижарага берилган ер эгалари билан учрашди. Учрашув давомида ижарага берилган ер участкаларидан самарали фойдаланишнинг ҳуқуқий асослари борасида тушунчалар берилди. Козимжон Комилов шартноманинг мазмуни, ердан фойдаланиш ҳуқуқи ва мажбуриятлари ҳақида батафсил маълумотлар берар экан, ер эгаларини бу имкониятдан самарали фойдаланишга чақирди. Учрашув давомида ер эгаларига Олий суд томонидан тайёрланган «Ижарага берилган ер участкаларидан самарали фойдаланишни ташкил этиш бўйича» методик қўлланмалар топширилди.

Учрашувда иштирок этган ер эгалари бу каби яратилаётган шароит ва имкониятлардан ҳамда ҳар бир қарич ердан унумли ва самарали фойдаланишлари ҳақида таъкидлаб ўтишди. Тадбир якунида иштирокчилар аҳолининг турмуш тарзини яхшилаш ва моддий фаровонлигини таъминлашга қаратилаётган алоҳида эътибор учун юртбошимизга самимий миннатдорчилик билдиришиб, ўз ташаккурномаларини йўллашди.

 

Қашқадарё вилоят суди жамоатчилик ва ОАВ билан алоқалар бўлими

ДИҚҚАТ, ТАНЛОВ!

Қашқадарё вилоят, туманлараро, туман ва шаҳар судларининг қуйидаги бўш иш ўринларига танлов эълон қилинади:

– Қашқадарё вилоят судининг катта консультанти вазифасига 1 нафар; (Қашқадарё вилоят суди Раёсатининг 2022 йил 22 январдаги РС-2-22-сонли қарорига кўра қуйи судда камида 1 йиллик узлуксиз меҳнат стажига эга бўлиш талаб этилади)

– Жиноят ишлари бўйича Касби туман судининг судья ёрдамчиси вазифасига 1 нафар;

– Жиноят ишлари бўйича Қарши шаҳар судининг судья ёрдамчиси вазифасига 2 нафар;

– Жиноят ишлари бўйича Қамаши туман судининг судья ёрдамчиси вазифасига 1 нафар;

– Жиноят ишлари бўйича Китоб туман судининг судья ёрдамчиси ва девонхона мудири вазифасига 1 нафардан;

Танловда олий юридик маълумотли, Ўзбекистон Республикаси фуқароси бўлган шахслар қатнашиши мумкин.

Номзодлар очиқлик, шаффофлик, тенглик принциплари асосида Комиссия томонидан белгиланган тартибда суҳбатдан ўтказилади.

 

Аризалар 2022 йил 28 апрель, соат 17:00 га қадар қабул қилинади.

Мурожаат учун тел: (75) 221-05–58.

Электрон почта манзили: jib.qash.mh@sud.uz

Манзил:  Қашқадарё вилоят суди (180108, Қарши шаҳри Бунёдкорлик кўчаси 10а уй)

Ғузор тумани судлари томонидан суд-ҳуқуқ масалалари бўйича сайёр қабул ташкил этилди

Қашқадарё вилоят суд органлари томонидан мунтазам равишда олис қишлоқ, маҳалла ва овулларда сайёр қабуллар ўтказиб келинмоқда. Суд-ҳуқуқ масалалари билан боғлиқ ана шундай қабуллардан навбатдагиси Ғузор туманида ташкил этилди.

Ғузор тумани судлари томонидан туманнинг «Пачкамар» маданият саройи биносида ташкил этилган сайёр қабул дастлаб суд раисларининг бугунги кунда мамлакатимиз суд-ҳуқуқ тизимидаги сўнгги янгилик ва ўзгаришлар ҳақидаги, шунингдек, мазкур сайёр қабулни ташкил этишдан кўзланган мақсад ҳақидаги батафсил тушунчалари билан бошланди.

 

Қабул давомида суд-ҳуқуқ масалалари бўйича мурожаат қилган жисмоний ва юридик шахсларнинг мурожаатлари тингланди ва  21 нафар фуқарога белгиланган тартибда ҳуқуқий тушунтиришлар берилди.

Қашқадарё вилоят судлари масъуллари томонидан аҳолининг суд-ҳуқуқ соҳасидаги муаммоларини ўрганиш ва ҳал қилишга қаратилган сайёр қабуллар ўтказиш бўйича алоҳида дастур ишлаб чиқилган бўлиб, унинг ижросини таъминлаш мақсадида изчил ишлар давом эттирилмоқда.

 

Қашқадарё вилоят суди жамоатчилик ва ОАВ билан алоқалар бўлими

Skip to content