Monthly Archives: Iyul 2022

Муаллифлик ҳуқуқи – давлат ҳимоясида

Ҳозирги кунда муалифлик ҳуқуқларининг бузилиши мавзуси долзарб масалага айланиб бормоқда. Биринчидан, бу янги нарса яратиш учун сарф-харажат қилмасдан фойда олишнинг осон йўлидир. Ўзининг моддий манфаатлари ҳақидагина бош қотирган фирибгарлар ўз ҳаракатларининг одоб-ахлоққа доир ва қонуний жиҳатлари ҳақида ўйлаб ҳам кўрмайди.

Иккинчидан, замонавий технологиялар маълумотларни кўпайтириш ва тарқатиш жараёнини ўта осон ва арзон ишга айлантириб қўйди.

Муаллифлик ҳуқуқи (инглиз тилидан олинган бўлиб, copyright) ғоя (фикр) ёки маълумотларнинг маълум бир кўринишдаги ифодаланишини тартибга солувчи эксклюзив ҳуқуқлар мажмуидир. Умумий қилиб айтганда, сўзма-сўз “кўчириш (нусха олиш) га бўлган ҳуқуқ”дир. Асосан, бу ҳуқуқлар чекланган муддатли бўлади.

Муаллифлик ҳуқуқи “асарларнинг” кенг турдаги креатив, интеллектуал, артистик шаклларида намоён бўлиши мумкин.  Булар қаторига шеърлар, тезислар, саҳна асарлари ва бошқа адабиёт асарлари, филмлар, хориографик асарлар, мусиқий композициялар, аудио ёзувлари, расмлар, чизмалар, скулптуралар, фоторасмлар, ЭҲМ дастурлари, радио ва телекўрсатувлари кабилар киради. Муаллифлик ҳуқуқи интелликтуал мулк ҳуқуқ тизимига кирувчи ҳуқуқ соҳаси ҳисобланади.

Муаллифлик ҳуқуқи бўйича 1952 йилги Жаҳон (Женева) конвенцияси ҳамда адабий ва бадиий асарларни ҳимоя қилиш тўғрисидаги Берн конвенцияси (1886) мавжуд. Берн конвенцияси Муаллифлик ҳуқуқини ҳимоя қилишнинг қатъий тизимини ўзида ифодалайди. Ўзбекистонда Муаллифлик ҳуқуқининг асосий нормалари Ўзбекистон Республикаси Фуқоролик кодекси (1041-1073-моддалар) ва “Муалифлик ва турдош ҳуқуқлар тўғрисида” ги Ўзбекистон Республикаси қонунида белгиланган.

Муаллифлик ҳуқуқи ва турдош ҳуқуқлар соҳасидаги низолар қонун ҳужжатларида белгиланган тартибда ҳал қилинади. Муаллифлик ҳуқуқи бузилишининг кенг тарқалган турларига плагиат (кўчирмачилик, маданий ўғрилик), асардан муаллиф рухсатисиз тижорат мақсадларида фойдаланиш, киради. Бундай ҳолларда ҳуқуқбузар муаллиф ҳуқуқларини тиклаши, унга етказилган зарарларини тўлаши лозим. Муаллиф ва ижрочи ўз ҳуқуқлари бузилган тақдирда, ҳуқуқбузардан  маънавий зиён қопланишини талаб қилишга ҳақлидир.

Мулкий ҳуқуқларни жамоавий асосда бошқарувчи ташкилот томонидан амалга ошираётган ташкилот мулкий ҳуқуқларини бошқариш шундай ташкилот томонидан амалга оширилаётган шахсларнинг бузилган муаллифлик ҳуқуқлари  ва турдош ҳуқуқларини ҳимоя қилиш қонунда белгиланган тартибда ўз номидан судга мурожаат қилишга ҳақлидир.

Муаллифлик ҳуқуқлари ёки турдош ҳуқуқлар бузилишининг олдини олиш ёки уни тўхтатиш учун зарур чоралар кўриш натижасида учинчи шахсга етказилган зарарлар, шунингдек, бундай чораларни амалга оширган шахс кўрган зарарлар ҳуқуқбузар ҳисобидан ундириб олиниши керак. (Ўзбекистон Республикаси “Муалифлик ва турдош ҳуқуқлар тўғрисида” ги қонунининг 65-моддаси)

2019 йил 2 майда Ўзбекистон Республикасининг 534-сонли Қонунига мувофиқ Маъмурий жавобгарлик тўғрисидаги кодексга интеллектуал мулк ҳуқуқини ҳимоя қилишга йўналтирилган ўзгартириш ва қўшимчалар киритилган. Унга кўра, асарларнинг ва турдош ҳуқуқлар объектларининг контрафакт нусхалари, шунингдек, уларни такрорлаш ҳамда тарқатиш учун фойдаланиладиган материаллар ва ускуналар, бошқа ҳуқуқбузарлик содир этиш қуроллари мусодара қилинади.

Мазкур тоифадаги ҳуқуқбузарликлар тўғрисидаги ишлар маъмурий судлар томонидан кўриб чиқилади. Бундай ҳуқуқбузарликни илк бор содир этган, ҳуқуқбузарлик аниқланган пайтдан бошлаб 30 кунлик муддатда ихтиёрий равишда йўл қўйилган ҳуқуқбузарликларни бартараф этган ва етказилган моддий зарарни қоплаган ҳуқуқбузарларга нисбатан маъмурий иш қўзғатилмайди, бошлангани эса тўхтатилади.

Қонун ҳамма учун баробар. Зеро, ҳар қандай ғайриқонуний ҳатти-ҳаракатлар учун жазо муқаррар. Инсон ўзини боши берк кўчага киргизадиган, жамият учун кераксиз шахсга айлантирадиган ва охир-оқибат барча яқинлари, оила-аъзолари олдида мулзам аҳволга келтирадиган қилмишлар сари қадам босмаслиги мақсадга мувофиқдир. Чунки, юксаклик сари олға қадам ташлаётган Янги Ўзбекистон келажаги учун ҳар бир шахс мақсадли режалар асосида ҳаракат қилмоғи лозим.

Лазиз Абдуллаев, фуқаролик ишлари бўйича Яккабоғ туманлараро суди судьяси

Мол-мулк низолари

Ўзбекистон Республикасида мулк дахлсиздир. Ҳар бир шахс мулкдор бўлишга ҳақли.

Ўзбекистон Республикасида иқтисодиётнинг ва халқ фаровонлигининг ўсишига имконият яратувчи ҳар қандай шаклдаги мулкчилик бўлишига рухсат берилади. Мулкчиликнинг ҳамма шакллари дахлсиз бўлишига ва уларнинг ривожланиши учун тенг шароит яратилишига қонун кафолат беради.

Ўзбекистон Республикаси мулкдорга қарашли бўлган мол-мулкни сақлаш ва кўпайтириб бориш учун барча зарур шароитларни яратиб беради. Ўзбекистон Республикаси Конститутциясининг 53-моддасига мувофиқ хусусий мулк дахлсиз ва давлат ҳимоясидадир.

Якка тартибда уй қуриш фуқароларнинг уй-жойга бўлган талаб-эҳтиёжларини қондиришга хизмат қилади ва давлат якка тартибдаги уй-жой қурилишига ер участкаларини ажратиш, уй қуришга ссуда ва кредитлар бериш йўли билан ҳар тарафлама кўмаклашади.

Мулкчиликнинг ҳамма шакллари тенг ҳуқуқли эканлиги Бош Қомусимиз бўлган Ўзбекистон Республикаси Конституциясида кафолатланганлиги, мулкчилик тўғрисидаги, ер тўғрисидаги, уй-жой фондини, мулкни давлат тасарруфидан чиқариш ва хусусийлаштириш тўғрисидаги бир қатор қонунларнинг қабул қилиниши, шунингдек, босқичма-босқич амалга оширилган иқтисодий ислоҳотлар, бозор муносабатларининг ривожланиши, кичик ва ўрта тадбиркорлик фаолиятининг қўллаб-қувватланиши натижасида қисқа вақт ичида фуқароларимиз турли кўчмас ва кўчар мулклар, хусусан, уй-жой ва нотурар-жой бинолари – ошхона, меҳмонхона, савдо дўконлари, корхоналар ва турли транспорт воситалари, акциялар ва бошқа қимматли қоғозлар, ер участкалари, фермер хўжаликлари ҳамда чорва моллари ва бошқа турдаги қонун билан таъқиқланмаган мулкларнинг эгасига айланди.

Олиб борилган иқтисодий ислоҳотларнинг самараси оқибатида жуда қисқа давр ичида жамиятда мулкдорлар синфи вужудга келди, уларнинг сони ва сифати кун сайин ошиб бормоқда. Мулкдорлар синфи вужудга келиши билан бир вақтда мавжуд мулкнинг авлоддан авлодга ўтишини ҳуқуқий тартибга солиш зарурияти туғилди ва 1997 йилнинг 1 мартидан амалга киритилган Ўзбекистон Республикаси Фуқаролик кодексининг V сонли бўлимида мулк эгасининг вафотидан кейин унинг барча мол-мулки унинг ворисларига ўтишига доир қонун нормалари мустаҳкамланди. Ворислик ҳуқуқи билан боғлиқ қонун нормаларининг судлар томонидан амалда тўғри ва бир хилда қўлланишини таъминлаш мақсадида 2011 йил 20 июлда Ўзбекистон Республикаси Олий суди Пленумининг “Судлар томонидан мерос ҳуқуқига оид қонунчиликнинг қўлланилиши тўғрисида” ги 5-сонли қарори қабул қилиниб, тегишли тушунтиришлар берилди.

Ҳар қандай соғлом фикрли инсон биргина ўз манфаатини кўзламасдан, ҳалол меҳнат орқали оиласини таъминлаш, мулкдор бўлиш, уни кўпайтириш ва ўзидан кейин авлодларига қолдириш йўлида меҳнат қилади.

Ўзбекистон Республикаси Конститутциясининг 54-моддасида мулкдорнинг ўз мулкига ўз хоҳишича эгалик қилиш, ундан фойдаланиш ва тасарруф қилиш ҳуқуқи мустаҳкамланган. Мулкдор ўзининг юқорида қайд этилган мулкка нисбатан барча ҳуқуқларидан ҳаётлик чоғида бевосита фойдаланади. Шунингдек, ўзи ҳаётлик чоғида ўз мулкининг вафотидан кейинги тақдирини васиятнома қолдириш орқали олдиндан белгилайди.

Амалдаги қонун нормаларида, мулк эгасининг вафотидан кейин унинг барча мол-мулки унинг ворисларига қонун бўйича ва васиятнома бўйича ўтиши белгилаб қўйилган. Васиятнома қолдирилмаган ҳолларда айни бир мулкни меросхўрлар ўртасида тақсимлаш билан боғлиқ низолар келиб чиқиши табиий.

Мол-мулк билан боғлиқ низолар асосан, қон-қариндош бўлган ота (она) ва фарзандлар, ака-ука, опа-сингил ворислар ўртасида юзага келади ва бунга асосан уларнинг амалдаги қонун нормаларини билмаслиги ва бири бошқасининг ҳуқуқини тан олмаслиги сабаб бўлади.

Мерос мулкини тақсимлашда ворислар ўзаро келишганлари энг мақбул ечим ҳисобланади. Чунки, низолашиш (суд томонидан қонуний ечим топилган тақдирда ҳам) ворислар ўртасидаги ўзаро яқинлик муносабатларига, меҳр-оқибатга путур еткзади.

Жамиятимиз инсонлар ўртасида соғлом муносабатлар қарор топиши, уларнинг бир-бирига муносабатлари яхши бўлишидан манфаатдордир. Зеро, соғлом муносабат, соғлом оилалар жамият негизини ташкил этади.

Олламурод Суюнов, фуқаролик ишлари бўйича Яккабоғ туманлараро суди раиси

Қашқадарё вилоят судлари томонидан тадбиркорлик субъектлари билан очиқ мулоқот ташкил этилди

Бугун Қарши шаҳрида жойлашган Корхоналарни соғломлаштириш ва хусусийлаштириш клиникасида Қашқадарё вилоят судлари судьялари томонидан тадбиркорлар иштирокида очиқ мулоқот ташкил этилди.

Унда тадбиркорлик субъектларига берилаётган имтиёзлар ва қулайликлар, мамлакатимиз суд-ҳуқуқ тизими соҳасида амалга оширилаётган ислоҳотлар, фуқаро ва тадбиркорларнинг ҳуқуқ ҳамда қонуний манфаатларини ишончли ҳимоя қилиш чораларини кучайтириш, одил судловнинг самарадорлигини ошириш бўйича амалга оширилган ишлар хусусида сўз юритилди.

Мулоқот давомида вилоятда фаолият юритаётган тадбиркорлик субъектларининг иш фаолияти жараёнида дуч келаётган муаммолар ва уларга имкон берувчи сабаб ва шарт-шароитларни бартараф этиш масалаларига эътибор қаратилди.

Судьялар иштирокида очиқ мулоқот тарзида ўтказилган ушбу учрашувда тадбиркорлар томонидан суд ишларини яхшилаш, тадбиркорларнинг манфаатларини ҳимоя қилиш борасида қонун ҳужжатларини янада такомиллаштириш юзасидан аниқ таклиф ва тавсиялар ҳам берилди ҳамда тадбиркорлар ўзларини қизиқтирган саволларга жавоб олишди.

Қашқадарё вилоят суди жамоатчилик ва ОАВ билан алоқалар бўлими

«Аёллар дафтари»га киритилган хотин-қизлар учун сайёр қабул ташкил этилди

Бугун жиноят ишлари бўйича Миришкор туман суди судьяси Б. Тагаев ва Касби туманлараро иқтисодий суди судяси Ҳ. Абраевлар иштирокида Миришкор тумани «Ободон» маҳалла маскани биносида «Аёллар дафтари»да турувчи хотин-қизлар учун сайёр қабул ўтказилди. Унда туманнинг «Ободон” ва Ўзбекистон» маҳалласида истиқомат қилувчи «Аёллар дафтари»га киритилган хотин-қизларнинг ҳуқуқий мавзудаги мурожаатлари тингланди.

Қабул давомида ижтимоий, иқтисодий, ҳуқуқий, психологик қўллаб-қувватлашга эҳтиёжи, билим ва касб-ҳунар ўрганишга иштиёқи бўлган, ишсиз хотин-қизларнинг муаммоларини аниқлаш, бартараф этиш ва назоратини олиб бориш ҳамда “Аёллар дафтари”га киритилган ва тадбиркорлик билан шуғулланиш истагида бўлган хотин-қизларнинг тадбиркорлигини йўлга қўйиш ва ривожлантириш бўйича ҳуқуқий тушунтиришлар берилди.

Қашқадарё вилоят суди жамоатчилик ва ОАВ билан алоқалар бўлими

ОДАМ САВДОСИ – ГЛОБАЛ МУАММО

Маълумки, одам савдоси – қулликнинг замонавий усули, қул савдосининг янги туридир. Жиноятчилар биринчи навбатда аёллар ва болаларни мажбурий меҳнат ва жинсий қуллик қопқонига алдаб туширади.

Одам савдоси инсонларни ҳуқуқ ва эркинликлардан маҳрум қилади, бутун дунёда уюшган жиноятчиликнинг ривожланишига сабаб бўлади. Шу жумладан, бу жиноят шахсларга хавф туғдириш йўли билан қўрқитиш, жисмоний ва руҳий тазйиқ ўтказиш, номусга тегиш, ҳужжатларни ўғирлаш орқали амалга оширилади. Жабрланувчилар меҳнат эксплуатацияси ва жинсий эксплуатацияга мажбур қилинади.

Ўзбекистон Республикасида одам савдосининг олдини олиш, унга чек қўйиш борасида турли чора-тадбирлар амалга оширилмоқда.

Жумладан, Ўзбекистон Республикаси Конституциясининг 13-моддасида, инсон, унинг ҳаёти, эркинлиги, шаъни, қадр-қиммати ва бошқа дахлсиз ҳуқуқлари олий қадрият ҳисобланиши белгилаб қўйилган.

Конституциянинг 26-моддасига кўра эса, ҳеч ким қийноққа солиниши, зўравонликка, шафқатсиз ёки инсон қадр-қимматини камситувчи бошқа тарздаги тазйиққа дучор этилиши мумкин эмас.

Одам савдосига қарши курашишнинг қонуний тартибга солиниши шахснинг ҳуқуқ ва эркинликларини ҳимоя қилишда самарали восита ҳисобланади.

Одам савдосига қарши кураш бўйича олиб борилаётган чора-тадбирлар самарадорлигини ошириш мақсадида Ўзбекистон Республикаси Адлия вазирлиги ва бошқа идоралар билан ҳамкорликда “Одам савдосига қарши курашиш тўғрисида”ги Қонун 2008 йил 17 апрелда қабул қилинди ва расман эълон қилинди.

Қонуннинг мақсади одам савдосига қарши курашиш билан боғлиқ масалаларни ҳал этишдан иборат. Шунингдек, одам савдосига қарши курашиш бўйича фаолиятни амалга оширувчи давлат органларининг ваколатлари қонунда аниқ кўрсатилган. Одам савдосига қарши курашиш фаолиятининг идоралараро характерга эга экани инобатга олиниб, одам савдосига қарши курашиш бўйича давлат органлари фаолиятини мувофиқлаштириш юзасидан одам савдосига қарши курашиш бўйича Республика идоралараро комиссиясини ташкил этиш белгиланган.

Шунингдек, Ўзбекистон Республикаси ЖКнинг 135-моддасида одам савдоси, яъни одамни олиш-сотиш ёхуд одамни ундан фойдаланиш мақсадида ёллаш, ташиш, топшириш, яшириш ёки қабул қилиш учун жиноий жавобгарлик назарда тутилган.

Шунга қарамасдан, мамлакатимизда одам савдоси билан боғлиқ жиноятлар содир этилаётгани ачинарли ҳолат.

Масалан, судланган Б.Эркаев ва Х.Шавкатовлар одамлардан фойдаланиш мақсадида ёллаб, уларни келгусида ишчи кучи сифатида ишлатиш орқали бойлик орттиришни мақсад қилиб, 2019 йил апрел ойининг бошларида 14 нафар фуқароларга Россия Федерациясининг об-ҳавоси жиҳатдан юртимизнинг иқлимига яқин бўлган Астрахан шаҳрида қурилиш ишлари билан шуғулланувчи фирмада иш борлигини, ойига 500 АҚШ долларидан ойма-ой иш ҳақи бериб борилишини, меҳнат шароитлари яхши эканлигини айтиб, уларни алдаб, ўзлари айтган фаолият билан шуғулланишга жалб қилиш учун уларга “Россия Федерациясига бориш учун кетадиган йўл ҳақини қурилиш фирмасининг ўзи тўлайди ва бир йиллик иш учун рухсатнома ҳам расмийлаштириб беради, ушбу харажатларни кейинчалик иш ҳақларингдан ушлаб қолаверади, бундан ташқари фирма ётоқ жой, бепул озиқ-овқат ва уст-бош билан ҳам таъминлайди” деб ишонтириб, уларнинг ваъдаларига ишониб, ишлаб келиш ниятида Россия Федерациясига бормоқчи бўлган 14 нафар фуқароларни Россия Федерацияси Астрахан шаҳрига эмас, Калмикия Республикасининг Элиста шаҳрига олиб бориб, фуқаролик паспортларини олиб қўйган ҳолда деярли икки ой давомида турли хил қурилиш ишларида ишлатиб, уларнинг ҳар бирига ишлаган иш ҳақи учун берилиши лозим бўлган 1000 АҚШ долларидан жами 14.000 АҚШ долларини бермасдан, қалмоқ миллатига мансуб “Дарзанг” исмли кишига текин ишчи кучи сифатида топшириб юборган.

Натижада “Дарзанг” исмли Россия Федерацияси фуқароси 14 нафар Ўзбекистон фуқароларини уриб-дўппослаб, жисмоний зўрлик ишлатиш орқали уларни мажбурий меҳнатга жалб қилиб, ишчи кучи сифатида ишлатиб, меҳнатидан фойдаланган.

Юқорида қайд этилган ҳатти-ҳаракатлари учун суд томонидан Т.Эргашевга Ўзбекистон Республикаси Жиноят кодекси 135-моддаси 2-қисмининг “а,б,е,з,и” бандлари билан ЖКнинг 57-моддасига асосан 3 йил  озодликдан маҳрум қилиш, Х.Шоназаровга Ўзбекистон Республикаси Жиноят кодекси 135-моддаси 2-қисмининг “а,б,е,з,и” бандлари билан ЖКнинг 57-моддасини қўллаб, иш ҳақининг 20 фоизини давлат даромадига ушлаб қолган ҳолда 3 йил ахлоқ тузатиш ишлари жазоси тайинланди.

Бу каби ҳолатларни кўплаб учратиш мумкин.

Хулоса қилиб айтганда, инсоннинг шаъни ва қадр-қиммати ҳурмат ва эъзозга лойиқ.

Инсоний қадриятларни топташга уринган ҳар қандай шахсга қонун олдида жавобгарлик муқаррардир.

Фозил Юсупов жиноят ишлари бўйича Косон туман судининг раиси

“Ярашув тўғрисидаги ишлар бўйича иш юритиш” мавзусида семинар машғулоти ташкил этилди

Ҳуқуқбузарликлар профилактикаси жамоат хавфсизлигини таъминлашда муҳим ҳисобланади. Шу сабабдан ҳуқуқбузарликлар профилактикасига доир тадбирларни амалга оширишда мавжуд бўлган муаммоларни бартараф қилиш мақсадида ички ишлар ва суд органлари ҳамкорлигида бир қатор чора-тадбирлар амалга оширилмоқда.

Ғузор туман Ички ишлар бўлимида профилактика инспекторлари иштирокида семинар машғулоти бўлиб ўтди. “Ярашув тўғрисидаги ишлар бўйича иш юритиш” мавзусида ташкил этилган мазкур семинар машғулотида жиноят ишлари бўйича Ғузор туман суди раиси Л.Расулова иштирок этди.

Маълумки, инсон ҳуқуқ ва манфаатларини таъминлаш, қадр-қимматини юксалтириш ҳар қайси жамиятда долзарб аҳамиятга эга.  Шу муносабат билан, тадбирда ярашув институтини кенг қўллаш, бу орқали фуқароларнинг ортиқча оворагарчилигига барҳам берилиши ва ҳар бир фуқаронинг  давлатимиз раҳбарининг «Инсон қадри учун» ғояси шу соҳада ҳам ҳукм сураётганлигига ишончи мустаҳкамланишига эришиш масаласига алоҳида эътибор қаратилди.

Семинарда профилактика инспекторлари билан “Маъмурий ҳуқуқбузарлик тўғрисидаги иш бўйича ярашув институтини тадбиқ қилиш” қўлланмаси хусусида фикр алмашилди.

Бундан ташқари, тадбирда профилактика инспекторларининг фаолиятида, шу жумладан суд органлари билан юзага келаётган муаммолари атрофлича муҳокама қилиниб, уларни баратаф қилиш борасида тегишли чора-тадбирлар белгилаб олинди.

Қашқадарё вилоят суди жамоатчилик ва ОАВ билан алоқалар бўлими

Тинчлик ва осойишталик – азиз ва бебаҳо неъмат

Ҳеч кимга сир эмас, дунёда энг қимматли, азиз ва бебаҳо неъмат – тинчлик неъматидир.

Тарихдан ҳаммамизга аёнки, ҳар бир давлат миллатига, фуқароларига, ўз маданий бойликларига, урф-одату, анъаналарига катта ҳурмат билан қараган ва уни қўз қорачиғидек асрайди. XXI асрга келиб эса, дунёдаги вазият тубдан ўзгарди, нотинчликлар ортиб борди.

Бугунги мураккаб замоннинг ўзи воқеликка очиқ кўз билан, теран ва чуқур мушоҳада юритган ҳолда назар ташлашни, ҳушёр қарашни, жаҳонда ва ён-атрофимизда тобора кучайиб бораётган маънавий таҳдид ва хатарларни тўғри баҳолаб, улардан тегишли сабоқлар чиқариб яшашни талаб этмоқда.

Тинчлик – халқларнинг энг эзгу орзуси. Яратгандан сўраган энг керакли тилагидир. Лекин бир нарсани унутмаслик лозим, кўриб турибмиз, дунёнинг ҳамма ерига ҳам бу улуғ неъмат бирдек насиб этмаган. Демак, бу неъматнинг шукрини қилишимиз, қадрига етишимиз зарур.

Ўзбекистон бугун жаҳон ҳамжамиятида муносиб ўрин эгаллади. У янги ҳаёт, янги жамият қуриш йўлида олиб бораётган ислоҳотлари билан, яратувчанлик меҳнати билан, ўзининг мустақил ички ва ташқи сиёсати билан дунё халқларининг ҳурмат-эътиборини, айтиш мумкинки, ҳавасини ўзига тортмоқда. Юртимизда тинчлик-осойишталик ҳукмрон ва, кўп миллатли бағрикенг халқимиз тинч-хотиржам турмуш кечирмоқда.

Бироқ, юртимиздаги ривожланиш ва юксалишларни кўра олмайдиган, ҳар-хил фитналар билан нотинчлик келтириб чиқаришга уринаётган қабиҳ ниятли гуруҳларнинг мавжудлиги бизни ҳар доим огоҳ бўлишга чорлайди. Куни кеча Нукус шаҳрида содир бўлган нохуш воқеалар ҳам бунга яққол мисол бўла олади.

Қандай қийинчиликлар бўлмасин, ҳамиша ўз юртига содиқ қолиб, ўз ерини севиб-ардоқлаб, мардона меҳнат қилаётган, беназир истеъдодларни вояга етказаётган қорақалпоқ халқига ҳар қанча тасанно айтсак, арзийди.

Ўзбекистон – улкан имкониятлар мамлакати, ҳаммамизнинг умумий уйимиз. Ўзаро тотувлигимизни, ягона мусаффо осмон остида яшайдиган барча миллат ва элатлар асрлар давомида эъзозлаб келаётган, барчамизнинг руҳан бойишимизга хизмат қиладиган маънавий ва ахлоқий қадриятларни доимо ёдда тутиш, кўз қорачиғидек асраш лозимлигини асло унутмаслигимиз даркор.

Муҳтарам Президентимиз раҳбарлигида юртимизда истиқомат қилаётган ҳар бир халқ ва миллатнинг этник ўзига хослиги, тили, урф-одати, анъаналарини сақлаш, одамларнинг тинч ва осойишта ҳаётини таъминлаш йўлида “Инсон қадри учун”, “Инсон-жамият-давлат” тамойили асосида кенг қамровли ислоҳотлар олиб борилмоқда.

Айнан тинчлик-осойишталик ҳукм сурган жойда, юксалиш ва тараққиёт бўлади, юрт гуллаб-яшнайди, фуқароларнинг турмуши фаровонлашади. Шу сабабли ҳар биримиз тинчлик-осойишталикка ўз-ўзидан эришиб бўлмаслигини тўғри англашимиз, бу ютуқлар ўз-ўзидан яратилмаганлиги, халқимизнинг сабр-бардош, ишонч, ҳамжиҳат-ҳамфикрликда яшаш, тинчлик-осойишталикни асраш, бағрикенглик, меҳр-оқибат кўрсатиш орқали эришилганлигини ёш авлодга тушунтиришмиз лозим. Бугунги мураккаб шароитда тинчликни асраш учун огоҳлик, сезгирлик, ҳушёрлик ҳар қачонгидан кўра муҳимлигини ҳаммамиз тўлиқ тушуниб етишимиз даркор.

Тинчлик ва осойишталикни доимий сақламоқ учун эса шу юртнинг ҳар бир фарзанди Ватан тинчлиги ва тараққиётини маълум бир соҳа вакилларининг вазифаси деб қарамасдан, балки менинг бурчим, менинг ор-номусим деб билиб, бирлик ва ҳамжиҳатликда ҳаракат қилмоқликлари ва фидойилик кўрсатмоқлари лозим.

Кўпни кўрган, қанчадан-қанча синов ва қийинчиликларни бошидан кечирган, ҳаётнинг барча оғирликларига бардош бериб, йўлидан адашмаган халқимизнинг ўз олдига буюк вазифа қилиб қўйган “Янги Ўзбекистон”ни барпо этишдек мақсадидан ҳеч ким ва ҳеч қачон қайтара олмайди.

Шаҳзод Бахтиёров Қашқадарё вилоят суди жиноят ишлари бўйича судьяси

Қашқадарё вилоят судлари масъуллари томонидан Қарши шаҳрида сайёр қабул ташкил этилди

Ҳуқуқий жиҳатдан кўмакка муҳтож бўлган фуқароларни қийнаб келаётган муаммоларни аниқлаб, жойида ижобий ҳал этиш, уларга зарур ҳуқуқий ёрдам кўрсатиш мақсадида Қашқадарё вилоят судлари масъуллари томонидан ўтказиб келинаётган сайёр қабулларнинг навбатдагиси Қарши шаҳри аҳолиси учун ўтказилди. Унда Қашқадарё вилоят суди раиси Абдуқаюм Маҳкамов ва ўринбосарлари, Қашқадарё вилоят маъмурий суди раиси Холис Муҳаммедовлар иштирок этишди.

Дастлаб, вилоят суди раиси Абдуқаюм Маҳкамов бугунги кунда суд-ҳуқуқ соҳасида олиб борилаётган ислоҳотлар, ушбу ислоҳотларнинг асл мақсади аҳолининг одил судловга бўлган ишончини ошириш, жамиятда қонун устуворлигини таъминлаш ва қонунийликни мустаҳкамлаш эканлиги ҳақида маълумотлар берди.

Сайёр қабул давомида 15 нафар фуқароларнинг суд-ҳуқуқ масалаларига оид мурожаатлари тингланиб, зарур бўлган ҳуқуқий кўмак ва маслаҳатлар берилди.

Шу куни сайёр қабул доирасида ЖИБ Қарши шаҳар суди томонидан сайёр суд тартибида ўтказилган мажлисда озодликдан маҳрум қилиш билан боғлиқ бўлмаган жазо ўтаётган 10 нафар маҳкумлар жазоларидан муддатидан илгари шартли равишда озод қилинди.

Қашқадарё вилоят суди жамоатчилик ва ОАВ билан алоқалар бўлими