Суд раислари ва ўринбосарлари Шаҳрисабз шаҳрида сайёр қабул ўтказишди

Жиноят ва ҳуқуқбузарликларнинг олдини олиш, аҳолининг ҳуқуқий мавзудаги мурожаатларига ечим излашга қаратилган ишларни жонлантириш мақсадида Қашқадарё вилоят суд органлари масъуллари томонидан 2022 йилда ҳам олис қишлоқ, маҳалла ва овулларда сайёр қабуллар ташкил этиш бошланди. Қашқадарё вилоят судлари масъуллари иштирокидаги илк сайёр қабул Шаҳрисабз шаҳрида ўтказилди. Унда Қашқадарё вилоят суди раиси Абдуқаюм Маҳкамов, Қашқадарё вилоят маъмурий суди раиси Холис Муҳаммедов ва Қашқадарё вилоят суди раиси ўринбосарлари иштирок этишди.

Ташкил этилган сайёр қабулда суд қарорлари ва ажримлари билан боғлиқ бўлган ҳамда турли ижтимоий-иқтисодий масалаларда ҳуқуқий маслаҳат ва кўмак сўраб келган 13 нафар фуқароларнинг мурожаатлари тингланди. Ҳар бир мурожаат суд масъуллари томонидан атрофлича ўрганилди. Мурожаатлар назоратга олиниб, кўмак сўраб келган фуқароларга ҳуқуқий маслаҳатлар берилди.

Сайёр қабул доирасида ўтказилган сайёр суд мажлисида Шаҳрисабз шаҳар ИИБ томонидан берилган 2 нафар маҳкумнинг ўталмай қолган жазосидан муддатидан илгари шартли равишда озод қилиш ҳақидаги тақдимномаси кўриб чиқилди ва мазкур фуқаролар жиноят ишлари бўйича Шаҳрисабз шаҳар суди томонидан муддатидан илгари шартли равишда озод этилди.

 

Қашқадарё вилоят суди жамоатчилик ва ОАВ билан алоқлар бўлими

ТАДБИРКОРЛАР ДИҚҚАТИГА!

Тадбиркорлик субъектларининг қонуний манфаатларини таъминлаш, суд-ҳуқуқ соҳасидаги муаммоли масалаларига белгиланган тартибда ечим топиш мақсадида Қашқадарё вилоят судлари фуқаролик ва иқтисодий ишлар бўйича судьялари томонидан ҳафтанинг ҳар жума кунлари “Тадбиркорлар куни” деб эълон қилинганлиги ҳамда тегишли жадваллар асосида уларни қабул қилиш йўлга қўйилганлиги маълум қилинади.

Мурожаатлар учун телефонлар: (75) 221-13-55    (75) 221-03-76

ОНА ФАРЁДИ…

Вояга етмаган Суннат дарсдан чиқиб, курсдоши Бобурни чеккага имлади-да паст овозда:

– Кайфиятинг қалай?

– Пули йўқ одамда кайфият бўладими?

– Кеча Зиёд Арабов менга топшириқ берди. Битта бақувват шерик топ, қўшниси Хуршид Самарқандда ишларкан, уйида фақат чол-кампир… ўғирлик қиламиз, деяпти.

– Розиман. Менинг ҳаққим қанча бўлади?

– Овимиз бароридан келса сенга ва менга Зиёд беш миллион сўмдан пул беришини ваъда қилди.

– Бўпти. – деди Бобур ховлиқиб. – Қачон бошлаймиз.

Орадан бир кун ўтгач  Суннат Бобурга  қўнғироқ қилиб “Три  пальма” тунги клуби олдидаги нон цехига келишини айтди. Тунги клуб рўпарасидаги нон цехида Суннат Зиёд Арабов билан Бобур Эгамбердиевларни таништирди. Улар ташқарига чиқишиб:

– “Буюк Турон” маҳалласидаги “Ёғду” кўчасида чол-кампир ва Гулбиби Чориевалар яшашади. Ўғли Хуршид Самарқандда ишлайди. Пули кўп. Девордан ошиб тушиб, доллару, пуллари, тиллаворларини оламиз. – деб маслаҳатни пишитишди. Темир труба, арматура бўлаги, пичоқ, ёғоч таёқ ҳамда қўлқоп, кўз кўриши учун тешилган бош кийимлар олишиб йўлга тушишди. Улар Ҳуршиднинг уйига жиноят содир этиш учун борганларида чироқлар учган, ҳамма томон зимистон қоронғилик эди. Уйнинг дарвозаси калити тешигидан ичкарида меҳмонлар бор эканлигини, бу уйга бир ҳафта ўтгач ўғирликка келишиларини келишиб ортга қайтишди. Йўлда  “Акфа” урнатилган ховлига дуч келишди. Уйнинг девориям, дарвозасиям йўқ эди.

– Бу уйнинг эгасининг пули бўлса, дарвоза, девор қилдирган бўларди. Керакмас. – деган қарорга келишади.

Шунда Суннат Баҳриддиновни мияси ишлаб кетди.

– “Узуннаво”қишлоғида холам Зулайҳо яшайди. Пули-доллари, тилла тақинчоқларининг ҳам турли ҳиллари бор. – деб шерикларини холасиникига ўғирликка тушишга кўндиради. Суннат Баҳриддинов холасининг уй тузилишини, пуллари, долларлари қаерда туришини тушунтириб берди.

2019 йилнинг 16 январга ўтар кечаси соат 03.00 да Қарши тумани Боғобод МФЙ. Узуннаво қишлоғидаги 237 хонадонга келишиб, Зулайҳо Киямова Зарифовнанинг уйига бостириб киришди. Юзларига ниқоб, қўлларига қўлқоп кийиб олишган эди. Гуруҳ аъзолари биргаликда ҳаракат қилишиб, уй эгалари ухлаб ётганлигидан фойдаланиб, босқинчиликни бошлаб юборишди. Бобур Баҳриддинов Зулайҳо Киямованинг устига ўтириб олиб, аёлнинг оғзини қўли билан ёпиб, қўлидаги темир бўлаги ва мушти билан уради. Зиёд Арабов ҳамда Бобур Эгамбердиевлар диванда ухлаб ётган З.Киямованинг ўғли  А.Тошпўлатовнинг боши ва танасига қўлларидаги қуроллари: темир труба, арматура ва ёғоч таёқлар билан танасининг турли соҳаларига дамба-дам, кўп миқдорда уриб жароҳат етказишади. Унинг ўлимини тезлаштириш мақсадида устига кўрпачалар бостириб, хонтахтани устига қуйишади. Ўғлининг калтакланаётганини кўрган она:

– Ўғлимга тегманглар, ана нима керак бўлса олинглар. – деб босқинчиларга ялинишга тушди. Зулайҳонинг гапираётганини кўрган босқинчи “Яна гапираяпти!” деб мушти билан урди. Она бор овози билан хириллаб “Асилжон!!! Асилжон!!!” дея фарёд чекди. Она гапирмаслиги учун унинг томоғидан босқинчи бўғиб олди. Шундаям Зулайҳо Зарифовна танасига урилаётган муштларга чидаб, бир иложини қилиб ўғли Асилжон ётган томонга бурилиб олди. Қора рангли шапка кийган, юзи очиқ ҳолатда бўлган нотаниш болага кўзи тушди. Босқинчининг юз тузилишини эслаб қолди. Нотаниш  бола қўлидаги нарсаси билан Аслиддин Тошпўлатовнинг боши, юзи, танасининг турли жойларига ураётганлигини, тепаётганлигини кўрди. Орқадан бир босқинчи “Кўрпасини олиб ташлаб ур!” дегач, ялинчоқ овозда:

– “Ўғлимни урма, нима керак  бўлса ол, фақат боламга тегинма!” деб йиғлаб ёлворди.

-Ия, бу аёл ҳали тирикку, унинг вена томирини тез кес, ўшанда ўлади. –

деб буйруқ берди. Зулайҳонинг устида ўтирган бола аёлнинг ўнг кафти томирини кесиб ташлади. Кейин аёлнинг бошини чап томонга қайириб, қаттиқ жисм билан урди, ўнг томонга қайириб яна урди, Зулайхо Зарифовна “Ўзини ўлганга солиб ётмаса ўғли Аслиддин Тошпўлатовга умуман ёрдам бера олмаслигини пайқаб, гуёки ўзини ўлгандек кўрсатиб ётди. Аёлнинг устидаги босқинчи унинг ўлган ёки ўлмаганлигини текшириб кўриш учун яна бир неча марта урди. Аммо Зулайҳо барчасига чидаб гўёки ҳушсиздек ётаверди. Зулайҳонинг тиббиётдан хабари борлиги учун қўлининг кесилган жойини букиб, қонни тўхтатишга ҳаракат қилди. Унинг устига кўрпаларни ташлашди, кўрпаларнинг бир бурчидан босқинчиларни кузатишга эришди ва ҳушидан кетди.

Босқинчилар Аслиддин Тошпўлатовнинг бошига қаттиқ жисм билан урганларида боши ёрилиб, зарб таъсирида отилган қонлар деворларга сачради. Калтакланиш таъсирида Аслиддин Тошпўлатов ўлди.

Босқинчилар 27.057.500 сўмлик тилла ва кумуш тақинчоқларни, 8.675.000 сўмлик кийим – кечакларни, 6655 АҚШ долларини, 44.530.000 пул маблағларини, 1 дона 1.100.000 сўмлик “Самсунг Ж2”, 1 дона 120.000 сўмлик “Нокиа”, 1 дона 100.000 сўмлик уяли телефонларни эгаллаб олишиб, жами: 139.259.455.05 сўмлик нарсаларни олиб жўнаб қолишди.

Босқинчилар кетишгач Зулайҳо Зарифовна ҳушига келиб, диванда ўғли йўқ эканлигини, ўзи полда ётганлигини, деворларга қон сачраганлигини кўрди. Судралиб уйдан чиқдида дарвозага, ундан бир девор қўшниси
Рустам Эшонқуловнинг уйи томон судралди. Қўшниси Рустам Эшонқулов ёрдамга келди.

Бу жиноятни содир қилганлар:

Арабов Зиёдбек Улуғбекович, 2000 йил 21 сентябр куни Қашқадарё вилоятининг Қарши шаҳрида туғилган, ўзбек, Ўзбекистон Республикаси фуқароси, маълумоти тугалланмаган ўрта-махсус, Қарши шаҳридаги “Агробизнес ва тадбиркорлик” коллежининг 3-босқич талабаси.

Эгамбердиев Бобурбек Баҳодирбекович, 2000 йил 16 декабр куни Қашқадарё вилоятининг Қарши шаҳрида туғилган, ўзбек, Ўзбекистон Республикаси фуқароси, маълумоти тугалланмаган ўрта-махсус, Қарши шаҳридаги “Агробизнес ва тадбиркорлик” коллежининг 3-босқич талабаси, муқаддам: Жиноят ишлари бўйича Қарши шаҳар судининг 2018 йил 11 декабрдаги ҳукмига асосан Ўзбекистон Республикаси ЖКнинг 131-моддаси 2-қисми билан айбли деб топилиб, ЖКнинг 82-моддасига асосан энг кам ойлик иш ҳақининг 7 баравари миқдорида, яъни 1.290.000 сўм жарима жазоси тайинланган.

Вояга етмаган Баҳриддинов Суннатбек Баҳриддинович, 2002 йил 23 январ куни Қашқадарё вилоятининг Қарши шаҳрида туғилган, ўзбек, Ўзбекистон Республикаси фуқароси, маълумоти тугалланмаган ўрта-махсус, Қарши шаҳридаги “Агробизнес ва тадбиркорлик” коллежининг 3-босқич талабаси, муқаддам судланмаган, бўйдоқ, Қашқадарё вилояти Қарши шаҳри “Темирчи” МФЙ Ал-Насафий кўчаси 27-уйда яшаган.

Босқинчиларнинг ҳар бири узоқ муддатли қамоқ жазосига ҳукм қилинди.

 

Фаррух Ниёзов, Қашқадарё вилоят суди жиноят ишлари бўйича судьяси

«Менга қонун талабларини тўғри тушунтиришгани учун суддан миннатдорман…»

Етказилган зарарни ундириш – мулк дахлсизлигини таъминлаш, фуқароларнинг ҳуқуқ ва манфаатларини ҳимоялашда муҳим аҳамиятга эга.

Судланган О.Х. жабрланувчи Л.Днинг мулкини фирибгарлик йўли билан қўлга киритганликда айбланиб, Ўзбекистон Республикаси ЖКнинг 168-моддаси 1-қисми билан 1 йил 6 ойга озодликдан маҳрум қилиш жазосига ҳукм қилинади.

Ишни апелляция инстанцияси судида кўриш давомида судланган О.Х ва унинг яқин қариндошларига Қонун талаблари, жумладан Жиноят кодекси 168-моддаси 5-қисми мазмуни тушунтирилиши натижасида унинг яқин қариндошлари томонидан жабрланувчига етказилган 17.120.000 сўм зарар тўлиқ ҳажмда қоплаб берилди.

Қашқадарё вилоят суди жиноят ишлари бўйича апелляция инстанциясининг ажрими билан суд ҳукми ўзгартирилиб, иш бўйича етказилган моддий зарар қопланганлиги сабабли ЖКнинг 168-моддаси 5-қисми талабларидан келиб чиқиб, шунингдек мазкур жиноят иши ЖКнинг 66-1-моддасига асосан жиноят ишини тарафлар ярашганлиги муносабати билан тугатиш институти доирасига тушса-да, апелляция инстанцияси судида ишни ярашилганлиги муносабати билан тугатиш ваколати йўқлиги, бироқ О.Хнинг қонун билан қўриқланадиган ҳуқуқ ва манфаатларидан келиб чиқиб,  ЖКнинг 70-моддасига асосан жазодан озод қилинди. О.Хга нисбатан қўлланилган “Қамоқ” эҳтиёт чораси бекор қилиниб, суд залида қамоқдан озод қилинди.

“Менга қонун талабларини тўғри тушунтиришгани учун суддан миннатдорман, шу муддат давомида ўз ҳаракатларим қонунга хилоф эканлигини тушуниб етдим, келгусида бу каби ноқонуний ишларга аралашмайман, ҳалол меҳнат қилишга ваъда бераман. Суд-ҳуқуқ соҳасида олиб борилаётган ислоҳотлар самарасини ўз мисолимда кўриб турибман, Президентимизга катта раҳмат”, – дейди О.Х, ўз қилмишидан пушаймон бўлиб.

 

Шаҳзод Бахтиёров, Қашқадарё вилоят суди жиноят ишлари бўйича судьяси

Оила ва никоҳ қадриятлари

Оила жисмонан соғлом, маънан етук фарзандларни камолга етказувчи мўжаз маскан. Ҳар жиҳатдан баркамол фарзандлар эса, эртамиз эгалари, нурли келажагимизнинг том маънодаги бунёдкорларидир. Айни чоғда, оиладаги тотувлик ва аҳиллик кишининг онгида хаётга муҳаббат, касбга садоқат, атрофдагиларга нисбатан ҳурмат ва эътибор сингари юксак инсоний фазилатларни ҳам шакллантиради. Шу боисдан ҳам мамлакатимизда оилалар мустаҳкамлигини таъминлаш, уни моддий ва маънавий жиҳатдан қўллаб-қувватлашга алоҳида эътибор қаратилади.

Юртимизда ҳар бир оила давлат муҳофазасига олинган бўлиб, Оила кодекси ва Олий суд Пленуми қарорига асосан тартибга солиш, оилавий ажралишларнинг олдини олиш, нафақат эр-хотин балки вояга етмаган фарзандларнинг ҳам ҳуқуқ ва манфаатларини ҳимоя қилишда муҳим аҳамиятга эга. Эътиборли жиҳати шундаки, ажралиш арафасида турган оилаларни яраштириш, юзага келган низоларни тинч йўл билан бартараф этиш борасида фуқаролик ишлари бўйича судлар ҳамда маҳалла фуқаролари йиғинлари қошида ташкил этилган яраштирув комиссиялари томонидан зарур чора-тадбирлар амалга оширилмоқда. Бироқ, олиб борилаётган изчил ишларга қарамай оилавий ажралишларнинг сони ортиб бормоқда.

Пароканда бўлган оилалар ҳақида сўз борар экан, бегуноҳ фарзандлар тақдири кишини беихтиёр ташвишга солади. Негаки, ота-онанинг айро яшашидан мурғак фарзандлар ҳаммадан кўп азият чекади.

Суд амалиётидаги таҳлиллар шуни кўрсатмоқдаки, 2021 йилда никоҳдан ажратиш ҳақида кўрилган фуқаролик ишлари статистикасига қараганда, судларга 3843 та даъво аризалари келиб тушган.

Шундан, 2379 та оилаларни яраштириш чоралари кўрилишига қарамай оила барбод бўлган ва никоҳдан ажратилган. 1205 та оилани ярашиб кетишига имкони бўлганлиги сабабли даъво талаблари рад ва кўрмасдан қолдирилган.

Бундан ташқари, 259 та оила фуқаролик ишлари бўйича судларнинг ташаббуси билан яраштирилиб, иш юритиш тугатилган ҳамда ҳозирги кунда биргаликда бахтли оила бўлиб яшаб келмоқда.

Вилоят суди фуқаролик ишлари бўйича судлов ҳайъати томонидан ўрганиш даврида никоҳдан ажратиш сабаблари таҳлил қилинганида, оилада моддий етишмовчилик, спиртли ичимликлар истеъмол қилиш, фарзандсизлик, ҳарактерлари тўғри келмаслик сабаблари кўплаб қайд этилган. Шунингдек никоҳдан ажратишнинг бошқа сабабларида аксарияти тарафларнинг ўзаро ишончни йўқотганлиги, қайнона-қайноталарнинг оиладаги аралашуви, эр-хотиннинг оилавий муносабатларида ўзаро келишмовчиликлар сабаблари ҳам кўплаб учрайди.

 

Баҳодир Азизов, Қашқадарё вилоят суди фуқаролик ишлари бўйича судлов ҳайъати судьяси

Д И Қ Қ А Т, Т А Н Л О В!

Қашқадарё вилоят, туманлараро, туман ва шаҳар судларининг қуйидаги бўш иш ўринларига танлов эълон қилинади:

-Қашқадарё вилоят судининг катта консультант вазифасига 1 нафар, (Қашқадарё вилоят суди Раёсатининг 2022 йил 22 январдаги РС-2-22-сонли қарорига кўра қуйи судда камида 1 йиллик узлуксиз меҳнат стажига эга бўлиш талаб этилади)

-Жиноят ишлари бўйича Касби туман судининг судья ёрдамчиси вазифасига 1 нафар;

-Жиноят ишлари бўйича Қамаши туман судининг судья ёрдамчиси вазифасига 1 нафар

-Жиноят ишлари бўйича Косон туман судининг судья ёрдамчиси вазифасига 1 нафар

-Жиноят ишлари бўйича Яккабоғ туман судининг судья ёрдамчиси вазифасига 1 нафар;

-Жиноят ишлари бўйича Деҳқонобод туман судининг судья ёрдамчиси вазифасига 1 нафар.

Танловда олий юридик маълумотли, Ўзбекистон Республикаси фуқароси бўлган шахслар қатнашиши мумкин.

Номзодлар очиқлик, шаффофлик, тенглик принциплари асосида Комиссия томонидан белгиланган тартибда суҳбатдан ўтказилади.

 

Аризалар 2022 йил 28 февраль соат 17:00 га қадар қабул қилинади.

Мурожаат учун тел: (75) 221-05–58.

Электрон почта манзили jib.qash.mh@sud.uz

Манзил:  Қашқадарё вилоят суди (180108, Qarshi, Bunyodkorlik k, 10auy)

Қашқадарё вилоят судида семинар ташкил этилди

Бугунги кунда илм, фан ва технологияларнинг жадал ривожланаётгани натижасида одамлар ўртасидаги ижтимоий муносабатларнинг турлари ва доираси кенгаймоқда. Жиноий-ҳуқуқий муносабатлар ҳам бундан мустасно эмас. Бинобарин, жиноятларни фош этиш, тергов қилиш ва судда кўриб чиқиш тартибини ҳам ислоҳ қилиш зарурати туғилаяпти.

Мамлакатимизда ҳам сўнгги йилларда жиноят ишларини юритишнинг анъанавий шаклларидан воз кечилиб, иш юритишни дифференциялаштиришга катта эътибор қаратилмоқда.

Қашқадарё вилоят судининг ташаббуси билан “Айбга иқрорлик тўғрисидаги келишув” ва “Дастлабки эшитув” институтларини қўллаш ҳамда Ўзбекистон Республикаси Олий суди Пленумининг 2021 йил 27 ноябрдаги “Терроризм ва экстремизмни молиялаштиришга оид жиноят ишлари бўйича суд амалиётининг айрим масалалари тўғрисида”ги Қарори мазмун-моҳияти юзасидан видеоконференцалоқа режимида семинар ташкил қилинди.

Семинарда прокуратура, суриштирув ва тергов органлари вакиллари ҳамда адвокатлар иштирок этишди.

2021 йил 18 февралда «Ўзбекистон Республикасининг Жиноят ҳамда Жиноят-процессуал кодексларига ўзгартиш ва қўшимчалар киритиш тўғрисида»ги 675-сонли Қонуни билан Жиноят-процессуал кодексига айбга иқрорлик тўғрисидаги келишув институти 62¹-боб сифатида ва “Дастлабки эшитув” институти 491-боб сифатида киритилди.

Семинарда, вилоят суди жиноят ишлари бўйича судлов ҳайъати томонидан мазкур институтларини қўллаш бўйича ўтган даврда суд амалиёти умумлаштирилганлиги ва таҳлил натижаларида аниқланган ҳолатлар сарҳисоб қилинди. Бу борада, йўл қўйилаётган хатоликлар, ушбу институтларни самарали қўллаш, вужудга келаётган муаммоалар ҳамда уларнинг ечими бўйича фикрлар билдирилди. Суриштирув, тергов органлари ва адвокатлар томонидан бу борада билдирилган фикрлар, таклифлар эшитилиб, савол-жавоб руҳида давом эттирилди.

Бундан ташқари, Ўзбекистон Республикаси Олий суди Пленумининг 2021 йил 27 ноябрдаги “Терроризм ва экстремизмни молиялаштиришга оид жиноят ишлари бўйича суд амалиётининг айрим масалалари тўғрисида”ги Қарорининг мазмун-моҳияти юзасидан фикр юритилиб, тергов органи амалиётида вужудга келаётган муаммолар ечими бўйича таклиф, фикр ва мулоҳазалар билдирилди.

Семинардан кўзланган мақсад, фуқароларнинг ҳуқуқий кафолатлари ҳамда ҳуқуқни муҳофаза қилувчи органларнинг амалга ошириши лозим бўлган ҳаракатлари юзасидан аниқ чора-тадбирлар белгилашдан иборат эканлиги таъкидланди.

Семинар якунлари бўйича келгусида ҳуқуқни муҳофаза қилувчи органлар билан ҳамкорликда бу каби семинар машғулотларини мунтазам ташкил қилиш, кун тартибидаги масалаларни ўзаро келишган ҳолда белгилаш, бунда айнан муаммоли масалаларни танлаб олиш ҳақида келишиб олинди.

 

Шаҳзод Бахтиёров, Қашқадарё вилоят суди жиноят ишлари бўйича судьяси

Афв – адолат ва инсонпарварлик ифодаси

Авф этиш – бу инсонпарварлик, бағрикенглик, кечиримлилик билан қонунийлик ва адолатни таъминлашдир.

Эътироф этиш керак, давлатимиз раҳбарининг судлар томонидан ҳукм қилинган маҳкумларни афв этиш тўғрисидаги Фармонлари халқимизнинг инсонпарварлик, бағрикенглик, кечиримлилик каби ўзига хос қадриятларининг чин маънодаги юксак намунаси бўлмоқда. Бунга жойларда мазкур ҳужжатнинг мазмун-моҳиятига бағишлаб ўтказилаётган тадбирлар, аҳоли билан бевосита мулоқотларда оддий одамлар билдираётган миннатдорлик сўзлари яққол мисол бўла олади.

Бизга маълумки, илгари ҳар йили юритимизда жиноят содир этган шахсларни кечиришнинг муҳим механизми ҳисобланган амнистия актлари қабул қилиб келинган. Бироқ, амнистияда аввал жиноятлар тоифасида белгиланиб, кейин эса ана шу жиноятлар тоифасига тушадиган шахслар доираси аниқланган бўлиб, бу эса, қилмишига пушаймон бўлмаган, етказилган зарарни тўлиқ қопламаган шахслар ҳам амнистия таъсирига тушишларига икмон берган ва жиноят содир этган шахсларда жазони ҳис этмаслик каби нотўғри фикрнинг шаклланишига ва жабрланган шахсларнинг ҳақли эътирозларига замин яратарди.

Президентимиз томонидан бу жараёндаги ноҳақликларга барҳам бериш мақсадида мутлоқо янгича ислоҳатга қўл урилди ва авф этиш ҳақидаги ҳужжатларни тайёрлаш ва тақдим қилиш бўйича махсус комиссия, ишчи гуруҳлар тузилди.

Кейинчалик, яъни 2018 йил 8 майда Ўзбекистон Республикаси Президентининг авф этишни амалга ошириш бўйича конституциявий ваколатини рўёбга чиқариш механизмларини такомиллаштириш мақсадида “Ўзбекистон Республикасида авф этишни амалга ошириш тартиби тўғрисидаги Низомни тасдиқлаш ҳақида”ги Фармон қабул қилиниб, авф этиш тўғрисидаги илтимосномани тақдим этиш, расмийлаштириш ва кўриб чиқиш, шунингдек бу масалалар бўйича комиссия фаолиятини ташкил этиш тартибини белгилаш бўйича Низом тасдиқланди.

Низомга мувофиқ, ҳуқуқни муҳофаза қилувчи органлар, судлар, жамоат ташкилотлари вакилларидан иборат ишчи гуруҳлар комиссия билан ўзаро ҳамкорликда бевосита жойларга чиқиб, ҳар бир маҳкум билан алоҳида суҳбатлашиб, уларнинг шахсини ўрганиб чиқади. Шунингдек, содир этилган жиноятнинг ижтимоий хавфлилик даражаси, унинг ўз қилмишидан пушаймонлиги, етказилган зарарнинг қопланганлиги, шахсини тавсифловчи ҳолатлар, ёши, соғлиғи, оилавий аҳволи, жабрланганлар, кенг жамоатчилик, маҳкумнинг яшаш жойи вакилларининг фикри ҳам эътиборга олинади.

Бу эса, ушбу механизмнинг очиқлиги ва шаффофлигини таъминлайди.

Ҳар бир шахснинг озодликдан маҳрум этилиши билан боғлиқ шароитига алоҳида эътибор қаратилиб, бу шахснинг оила, маҳалла ва ҳудуддаги яшаш шароити ҳисобга олинмоқда.

Статистик маълумотларга эътибор қаратсак, ўтган 5 йил ичида 5362 нафар маҳкум авф этилган бўлиб, шундан 1242 нафари жазодан тўлиқ, 1104 нафари шартли озод қилинган бўлса, 496 нафар маҳкумнинг жазолари енгилроқ жазога алмаштирилган, 2515 нафарнинг жазо муддати қисқартирилган.

Авф этилганларнинг 405 нафари аёллар, 165 нафарини 60 ёшдан ошган эркаклар ташкил қилган, 219 нафари хориж фуқаролари ҳам авф этилганлар.

Яқинда эълон қилинган Фармон билан бу рўйхат янада кенгайди.

Президентимизнинг 2021 йил 31 январда қабул қилган Фармонлари билан озодликдан маҳрум этиш жазосини ўтаётган, қилмишига пушаймон бўлган ва тузалиш йўлига ўтган яна 63 нафар маҳкум авф этилди. Улардан 44 нафари жазодан шартли озод қилинган бўлса, 19 нафарига тайинланган жазо муддатлари қисқартирилди.

Бу билан қанчадан-қанча адашган ва тузалиш йўлига ўтган шахслар оиласи бағрига қайтиб, жамиятда ўз ўрни борлигини ҳис қилиш имконияти яратилмоқда.

Дарҳиқиқат, бугун юртимизда олиб борилаётган барча йўналишдаги ислоҳатларнинг марказида инсон омили турибди. Бу ҳаётий ҳақиқатни Прзидентимиз Ш.Мирзиёевнинг Олий Мажлисга йўллаган мурожаатномасидаги “Инсон манфаатлари ва яна бир бор инсон манфаати ислоҳотларнинг бош мақсади этиб белгиланди”-деб, билдирган сўзлари ҳам исботлаб турибди.

Зотан, ислоҳотлардан кўзланган асосий мақсад ҳам шу юртда яшаётган ҳар бир инсонинг орзу-умидларини рўёбга чиқариш ҳамда унинг учун муносиб турмуш шароитларини яратишдан иборат экан, адашиб жиноят кўчасига кирган, айни пайтда пушаймон ҳамюртларимизнинг тузалиш йўлига кириши, эркин ҳаётга қайтиши ва келгуси тақдирига барча бирдек маъсул эканлигимизни унутмаслигимиз даркор.

 

Ш.Бахтиёров, Қашқадарё вилоят суди жиноят ишлари бўйича судьяси

Мангуликка дахлдор мутафаккирлар

Шу кунларда сўз мулкининг султони, буюк мутафаккир Алишер Навоий таваллудининг 581 йиллиги ҳамда шоҳ ва шоир Заҳириддин Муҳаммад Бобур таваллудининг 539 йиллиги юртимиз бўйлаб кенг нишонланмоқда. Ана шундай тадбирлардан бири Қашқадарё вилоят судида бўлиб ўтди.

Буюк аждодларимиз таваллуди муносаби билан “Мангуликка дахлдор мутафаккирлар” деб номланган маънавий-маърифий тадбирда Қашқадарё вилоят суди раиси Абдуқаюм Маҳкамов, Қашқадарё вилоят Маъмурий суди раиси Холис Муҳамедов, Қашқадарё вилояти судлари судьялари, ходимлари, суд фахрийлари, адабиётшунослар ва санъат вакиллари иштирок этишди.

Тадбирда буюк сиймоларимиз Навоий ва Бобурнинг ижодий, маънавий мероси халқимизнинг қалб қўридан мустаҳкам жой олганлиги, ёшлар тарбиясида муҳим аҳамият касб этиши, уларни янада кенгроқ тарғиб этиш, ўқиб-ўрганиш зарурлиги, икки буюк шахснинг нафақат ўзбек адабий тили, адабиёти, балки ўзбек давлатчилиги, халқимиз маънавиятини юксалишидаги хизматлари беқиёс эканлиги таъкидланди.

Тадбирда сўз олганлар ва таклиф этилган адабиётшунослар Навоий ва Бобур ижодининг ўзига хос қирралари хусусида сўз юритишди, уларнинг ижодидан намуналар ўқишди. Алломаларимиз ғазалларига басталанган мумтоз қўшиқларнинг ижро этилиши эса тадбир иштирокчиларига бир олам қувонч бағишлади.

 

Қашқадарё вилоят суди жамоатчилик ва ОАВ билан алоқалар бўлими

Сифатли ижро – муҳим масала

Бугунги кунда мамлакатимизда суд ҳужжатлари ва бошқа органлар ҳужжатларини ижро этиш тизимини илғор хорижий тажриба асосида такомиллаштириш бўйича кенг кўламли ишлар амалга оширилиб келинмоқда.

Қашқадарё вилоят суди фуқаролик ишлари бўйича судлар томонидан жорий йилда Мажбурий ижро бюроларига жами 51.742 та 249.251.392.673 сўмлик ижро ҳужжатлари электрон тарзда юборилган.

Хусусан, 25.514 таси 18.487.338.374 сўмлик давлат божи ундириш тўғрисидаги, 1147 та 1.927.902.959 сўмлик коммунал қарздорлик ундириш ва бошқа тоифадаги ижро ҳужжатлари юборилган.

Шундан 8182 та 33.270.315.594 сўмлик ижро ҳужжатлари тамомланган.

Шунингдек, 42.964 та  211.425.532.024 сўмлик ижро ҳужжатлари ундирувчиларга юборилган бўлиб, ҳозирда ундириш жараёни давом этмоқда.

Бу каби ишлар фуқароларимизнинг одил судловга бўлган ишончини янада мустаҳкамлаш, суд ҳокмиятининг нуфузини кучайтириш мақсадида суд ҳужжатлари ижросининг самарадорлигини янада оширишга хизмат қилмоқда.

Қашқадарё вилоят суди судьялари ва Мажбурий ижро бюроси давлат ижрочилари иштирокида семинар  машғулоти ўтказилди. Семинар давомида суд ҳужжатларини ўз вақтида ва сифатли ижро этишнинг механизмларини жорий этиш, фуқароларимизнинг одил судловга бўлган ишончини янада мустаҳкамлашга хизмат қилиши хусусида сўз борди.

Таҳлиллар кўра вилоят ва туманлараро, туман судлари томонидан чиқарилган ижро ҳужжатларининг аксарияти “Суд ҳужжатлари ва бошқа органлар ҳужжатларини ижро этиш тўғрисида”ги Қонуннинг 8-модда 1-қисм 4-банди, яъни “ундирувчи ва қарздорнинг номи, уларнинг манзиллари; жисмоний шахслар учун — қарздорнинг туғилган санаси ва жойи, иш жойи қарздор жисмоний шахснинг шахсий идентификация рақами (Ўзбекистон Республикаси фуқаролари бўлмаган жисмоний шахсларнинг шахсини тасдиқловчи бошқа ҳужжатларнинг реквизитлари), шунингдек қарздор юридик шахснинг солиқ тўловчи идентификация рақами” талабларга риоя қилинмганлиги сабаби билан қайтарилган.

Ушбу қонуннинг 8-моддасига кўра, ижро ҳужжатида қуйидагилар кўрсатилиши лозим:

1) ижро ҳужжатини берган суд ёки бошқа органнинг номи;

2) ижро ҳужжатининг қайси иш бўйича берилганлиги ва унинг тартиб рақами;

3) ижро этилиши шарт бўлган суд ҳужжати ёки бошқа орган ҳужжати қабул қилинган сана;

4) ундирувчи ва қарздорнинг номи, уларнинг манзиллари; жисмоний шахслар учун — қарздорнинг туғилган санаси ва жойи, иш жойи қарздор жисмоний шахснинг шахсий идентификация рақами (Ўзбекистон Республикаси фуқаролари бўлмаган жисмоний шахсларнинг шахсини тасдиқловчи бошқа ҳужжатларнинг реквизитлари), шунингдек қарздор юридик шахснинг солиқ тўловчи идентификация рақами;

5) суд ҳужжати ёки бошқа орган ҳужжатининг қарор қисми;

6) суд ҳужжати ёки бошқа орган ҳужжати кучга кирган сана;

7) ижро ҳужжати берилган сана ва уни ижрога топшириш муддати.

Суд ҳужжати асосида берилган ижро ҳужжати судья томонидан имзоланади ва суднинг гербли муҳри билан тасдиқланади.

Бошқа органнинг ҳужжати асосида берилган ижро ҳужжати мазкур ҳужжатни қабул қилган органнинг ваколатли мансабдор шахси томонидан имзоланади ва тегишли органнинг муҳри билан тасдиқланади.

Келгусида фуқаролик ишлари бўйича барча туманлараро ва туман суларининг “E-XSUD” электрон базаси билан ишлайдиган маъсул ходимлари электрон база билан ишлаш жараёнида хато ва камчиликларга йўл қўйилган тақдирда интизомий жавобгарликка тортилиши ҳақида огоҳлантирилди.

Бундан ташқари, судларга кайтарилган ижро ҳужжатларини бир иш куни муддати ичида камчилигини бартараф этган ҳолда қайтадан мажбурий ижро бюросига такроран юборилиши устидан доимий назорат олиб борилиши лозимлиги таъкидлаб ўтилди.

 

Баҳодир Азизов, Қашқадарё вилоят суди фуқаролик ишлари бўйича судьяси

Skip to content