Author: admin

Судьялар тиббиёт ходимлари билан учрашди

Қашқадарё вилоят судининг жиноят ишлари бўйича судьялари Фаррух Ниязов ҳамда Фозил Юсуповлар Қарши шаҳридаги 5-оилавий поликлиникада тиббиёт ходимлари иштирокида давра суҳбати ўтказишди.

Тадбирда судьялар “Коррупция – хавфли иллат” ва “Ўзбекистон Республикасининг “Фуқаролар соғлигини сақлаш тўғрисида”ги Қонуни ва касб юзасидан ўз вазифаларини лозим даражада бажармаслик билан боғлиқ жиноятлар учун жавобгарликнинг юзага келиш тартиби ва мазмун-моҳияти” мавзуларида маъруза қилишди.

Қашқадарё вилоят суди жамоатчилик ва ОАВ билан алоқалар бўлими

Судья иштирокида давра суҳбати

Қашқадарё вилоят судининг жиноят ишлари бўйича судьяси Фаррух Ниязов томонидан Санитария-эпидемиологик осойишталик ва жамоат саломатлиги хизмати Қарши шаҳар бўлими ишчи ходимлари иштирокида давра суҳбати ташкил этилди.

Унда судья Фаррух Ниязов “Коррупция – ривожланишимизга тўсиқ” ҳамда “Ўзбекистон Республикаси Маъмурий жавобгарлик тўғрисидаги кодекснинг 54-моддасида назарда тутилган эпидемияларга қарши кураш қоидаларини бузиш ҳуқуқбузарлиги мазмун-моҳияти ва ушбу ҳуқуқбузарлик учун жавобгарликка тортиш тартиби” мавзуларида маъруза қилди.

Қашқадарё вилоят суди жамоатчилик ва ОАВ билан алоқалар бўлими

ГИЁҲВАНДЛИК-ГЛОБАЛ МУАММО

Маълумки, гиёҳвандлик-бутун дунёда кенг жамоатчиликни ташвишга солаётган энг долзарб муаммолардан бири ҳисобланади.

Шу жумладан, гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш билан боғлиқ жиноятларнинг ижтимоий хавфлилик даражаси жуда юқори.

Гиёҳвандлик воситалари, уларнинг аналоглари ёки психотроп моддаларни истеъмол қилишнинг ортиши биринчи ўринда оғир касалликлар ва жиноятлар содир этилишининг кўпайишига олиб келади.

Ҳақиқатан ҳам бу инсониятни ташвишга солиб келаётган иллатдир.

Бугунги кунда гиёҳвандлик воситалари, уларнинг аналоглари ёки психотроп моддаларнинг ноқонуний савдоси умуминсоний муаммолардан бирига айланаётганлиги ҳақида жамият ҳаётида ва оммавий ахборот воситаларида бот-бот таъкидланиб келинаётган бўлса-да, бироқ жамиятда пул учун ҳар қандай қилмишдан қайтмайдиган, ўзини ва ўзгалар ҳаётини хавф остида қолдириб, қонунга хилоф равишда ушбу моддаларни ўтказиш ва сотиш билан шуғулланиб келаётган  бу тоифадаги шахсларнинг мавжудлиги барчамизни бирдек ташвишга солмасдан қўймайди.

Масалан, Ш.А. жиноий шериги Т.У. билан олдиндан ўзаро жиноий тил бириктириб, бир гуруҳ бўлиб, келишилган жиноий режага кўра Ш.А. 2019 йил 6 февраль куни дастлабки терговда қисми алоҳида иш юритувига ажратилган “Исроил” исмли шахсдан 1 килограмм “Героин” гиёҳвандлик васитасини 15.000 АҚШ долларига сотиб олиб, Т.У.нинг Косон туманида жойлашган уйига олиб келган. Шундан сўнг, Т.Улуғов ва Ш.А.лар ушбу 1 килограмм “Героин” гиёҳвандлик васитасини 2019 йил 7 февраль куни Чироқчи тумани “Еттитом” чорраҳаси ҳудудига ёнларида пинҳона яширган ҳолда олиб келиб, шу куни соат 11:40ларда “Ласетти” русумли 01 А 000 АА давлат рақамли хизмат автомашинаси ичида, тадбирда “шартли харидор” сифатида жалб қилинган шахсга 20.000 АҚШ долларига сотган вақтида ҳуқуқни муҳофаза қилувчи идора ходимлари томонидан жиноят устида ушланган.

Аниқланишича, Ш.А ва Т.У. муқаддам контрабанда ва кўп миқдордаги гиёҳвандлик воситаларини ўтказиш, сотиш ва сақлаш жиноятларини содир этганлиги учун судланиб, жазони ўтаб чиққан бўлса-да, бундан хулоса чиқармасдан, яна қасддан шу турдаги ўта оғир жиноятни содир этишган.

Ш.А ва Т.У.нинг ўта хавфли рецидивист ҳисобланиши, жазодан хулоса чиқармасдан яна қасддан жиноят содир этганлиги, содир этилган жиноятнинг хусусияти ва ижтимоий хавфлилик даражаси эътиборга олиниб, суднинг ҳукмига асосан Т.У.га Ўзбекистон Республикаси Жиноят кодексининг 273-моддаси 5-қисми билан 10 йил 6 ой озодликдан маҳрум қилиш жазоси, Ш.А.га Ўзбекистон Республикаси Жиноят кодексининг 273-моддаси 5-қисми билан 10 йил озодликдан маҳрум қилиш жазоси тайинланди ва ЖКнинг 34-моддасига асосан ўта хавфли рецидивист деб топилиб, жазони махсус тартибли колонияларда ўташи белгиланди.

Хулоса ўрнида шуни айтиш жоизки, Ш.А ва Т.У.лар жазодан хулоса чиқариб, енгил-елпи ҳаётга берилмасдан, ҳалол меҳнати билан оиласи бағрида кун кечирганида, Ш.А ва Т.У.ларнинг бошига яна шу қисмат тушмаган ва навқирон умри завол кетмаган бўлар эди.

Фозил Юсупов, Қашқадарё вилоят судининг жиноят ишлари бўйича судьяси

Қашқадарё вилоят судлари раислари ва ўринбосарлари иштирокида Қарши туманида сайёр қабул бўлиб ўтди

Қашқадарё вилоят суд органлари масъуллари томонидан ўтказиб келинаётган сайёр қабулларда юртдошларимизнинг  муаммолари ўз жойларига бориб ўрганилмоқда,  уларнинг ечими бўйича самарали ишлар қилинмоқда.  Қарши тумани Қоратепа маҳалла фуқаролар йиғинида ташкил этилган сайёр қабулда Қашқадарё вилоят суди раиси Абдуқаюм Маҳкамов, Қашқадарё вилоят Маъмурий раиси Холис Муҳаммедов ва Қашқадарё вилоят суди раиси ўринбосарлари иштирок этишди.

Ташкил этилган сайёр қабулда асосан меҳнат низолари,  оилавий низолари ва турли соҳалардаги муаммолари бўйича ҳуқуқий ёрдам сўраб қилган 13 нафар фуқароларнинг мурожаатлари ўрганилиб, уларга ҳуқуқий тушунтиришлар берилди. Сайёр қабул доирасида Жиноят ишлари бўйича Қарши туман судининг сайёр мажлиси ўтказилиб, унда 6 нафар маҳкумга нисбатан инсонийлик тамойили қўланилган ҳолда муддатидан олдин шартли равишда озод этилди.

Бу каби тадбирларнинг ўтказилиши халқни рози қилишга, низоларни судгача ҳал этишга, жамиятда соғлом муҳитни шакллантириш билан бирга, қонун устуворлигини таъминлашга хизмат қилади. Вилоятимизнинг чекка ҳудудлари бўйлаб Қашқадарё вилоят судлари раислари ва ўринбосарлари иштирокидаги сайёр қабуллар давом этади.

Қашқадарё вилоят суди жамоатчилик ва ОАВ билан алоқалар бўлими

Суд фахрийлари шарафланди

Ўзбекистон Республикаси Конституцияси қабул қилинганининг 29 йиллиги муносабати билан ташкил этилган навбатдаги учрашувда Қашқадарё вилоят судларининг судьялари, ходимлари ва суд фахрийлари иштирок этишди.

Тадбир иштирокчилари дастлаб Қарши тумани Қовчин қишлоғида жойлашган “Абул Муин Насафий” зиёратгоҳига ташриф буюришди. Улуғ бобокалонимиз мақбаралари зиёрат қилиниб, Қуръон тиловат қилинди. Абу Муин Насафийнинг Ислом оламида тутган ўрни ва даражаси, қолдирган асарлари ва динимиз софлигини асраш йўлидаги улуғ хизматларини ёдга олишди.

Навбатда Қарши шаҳридаги Қатағон қурбонлари хотираси музейи Қашқадарё вилояти бўлимига саёҳат уюштирилди. Йиғилганлар музей билан танишар экан, Туркистон ўлкасида олиб борилган мустамлакачилик сиёсати ва қатағонларни акс эттирувчи ноёб тарихий фотосуратлар, хариталар, ашёлар ва бошқа манбалар акс эттирилганининг гувоҳи бўлишди. Музейда ташкил этилган ёшлар клуби ҳамда кутубхона фаолияти билан ҳам яқиндан танишишди.

Суд фахрийлари иштирокидаги учрашув Қарши Маданият марказида Ўзбекистон Республикаси Конституцияси қабул қилинганининг 29 йиллиги муносабати билан ташкил этилган байрам тадбири билан давом этди.

Қашқадарё вилоят суди жамоатчилик ва ОАВ билан алоқалар бўлими

Талабалар иштирокида давра суҳбати ўтказилди

Шаҳрисабз туманлараро иқтисодий суди судьяси О.Қурбонов Тошкент кимё-технология институтининг Шаҳрисабз филиали талабалари иштирокида давра суҳбати ўтказди. Давра суҳбатида О.Қурбонов талабаларга “Конституция – бош қомусимиз”, “Коррупция – тараққиёт кушандаси” ва “Хотин-қизлар ва эркаклар тенг ҳуқуқлилиги кафолати” мавзуларида маъруза қилди.

Самимий руҳда ўтказилган давра суҳбатида талабалар ўзларини қизиқтирган бир қатор саволларига жавоб олишди.

Қашқадарё вилоят суди жамоатчилик ва ОАВ билан алоқалар бўлими

“Коррупция-жамият ривожига тўсиқ”

Ҳаммамизга маълумки, Ўзбекистон қисқа муддат ичида ўзи танлаган тараққиёт йўлидан дадил одимлаб, давлатимиз раҳбари Шавкат Миромонович Мирзиёев раҳбарлигида олиб борилаётган изчил ислоҳотлар туфайли жаҳон ҳамжамиятида обрў-эътибори тобора ортиб бормоқда. Йилдан йилга халқ фаровонлиги ошиб, аҳолининг иқтисодий имкониятлари кенгаймоқда. Юртимизда ҳар бир соҳа вакиллари қўллаб-қувватланиб, уларга яхши яшаш шароити учун давлат томонидан бир қатор имтиёзлар берилмоқда.

Шунга қарамасдан, нафақат республикамиз, балки ер юзидаги барча мамлакатлар тараққиётига салбий таъсир этаётган, ҳаммани бирдек ташвишга солаётган муаммолар мавжудки, улардан бири бу-коррупциядир.

Коррупция – лотинча сўздан олинган бўлиб, “порага сотилиш, айниш” деган маъноларни англатади. Коррупция-сиёсат ва давлат бошқаруви соҳасидаги ижтимоий хавфли ҳодиса, давлат функцияларини бажариш ваколатига эга бўлган шаxсларнинг ноқонуний тарзда моддий ва бошқа бойликлар, имтиёзларни олишда ўз мақоми ва у билан боғлиқ имкониятлардан фойдаланишидир. Коррупция ва порахўрлик давлатни ич-ичидан емириши жаҳондаги баъзи чет давлатлар тажрибасидан яхши маълум.

Коррупция домига илинган амалдорлар шахсий бойлик орттириш мақсадларини ва уруғ-аймоқларнинг манфаатларини давлат манфаатларидан устун қўяди.

Коррупциянинг авж олиши давлатнинг конституциявий асосларини емиради, фуқароларнинг ҳуқуқ ва эркинликлари жиддий тарзда бузилишига олиб келади.

Дунёда кўплаб жиноятларга сабаб бўлаётган нафс балоси, яъни коррупция ва порахўрлик натижасида давлат тараққиёти издан чиқади, жамият азият чекади.

Шу сабабли, Бирлашган Миллатлар Ташкилоти ҳам бу иллатларни энг глобал муаммолардан бири сифатида эътироф этиб, уларга қарши курашиш масалаларига жиддий эътибор қаратиб келмоқда. Хусусан, БМТнинг 2003 йил 31 октябрда қабул қилинган Коррупцияга қарши конвенцияси халқаро-ҳуқуқий ҳужжат бўлиб, унда коррупцияга қарши халқаро ва миллий кураш амалиётини йўлга қўйиш ҳамда уларни амалга ошириш механизмлари белгилаб берилган. Давлатимиз ҳам 2008 йилда ушбу конвенцияга қўшилган.

Ўзбекистонда мазкур иллатнинг сабабларини аниқлаш ва бартараф этиш борасида кенг қамровли ишлар амалга оширилмоқда, ушбу тоифадаги жиноятчиларга нисбатан қатъий чоралар кўрилмоқда. Давлат хизматчилари ва мансабдор шахсларнинг коррупция домига тушиб қолмасликларини таъминлаш, уларнинг бебошлигига йўл қўймаслик мақсадида ҳукуматимиз томонидан узоқ муддатли чора-тадбирлар дастурлари ишлаб чиқилган ва уларнинг ижроси доимий назорат қилинмоқда.

Мамлакатимизда коррупцияга қарши курашишнинг барча ҳуқуқий асослари яратилган. Жиноят қонунчилигида бу иллат учун қатъий жазо чоралари белгиланган.

Шунингдек, 2017 йил 3 январда “Коррупцияга қарши курашиш тўғрисида”ги Ўзбекистон Республикасининг Қонуни қабул қилинган.

Ўзбекистон Республикаси Президентининг 2020 йил 29 июндаги ПҚ-4761-сонли қарори билан Ўзбекистон Республикаси коррупцияга қарши курашиш агентлиги ташкил этилди.

Буларнинг барчаси жамиятимиз ривожига тўсиқ бўлаётган коррупция иллатини эрта аниқлаш, унга қарши муросасиз курашиш ва коррупцияни бартараф этиш учун хизмат қилиб келмоқда.

Шунга қарамасдан, айрим ҳолатларда жамиятимизда коррупция билан боғлиқ жиноятлар содир этилаётганлиги барчамизни бирдек ўйлантирмасдан қолмайди.

Шундайлардан бири, Ж.С исмли шахс, Давлат санитария-эпидемиология бошқармаси туман филиалининг бирида бошлиқ лавозимида ишлаб келиб, мансабдор шахс бўлгани ҳолда мансаб мавқеидан фойдаланиб, маъмурий жарима қўллаш ҳақида қарор чиқариш масаласини ҳал этиш учун профилактика инспектори томонидан Г.Б ва Т.М.ларга жамоат жойларида ниқоб тақмасдан юрганлиги ҳолати бўйича Ўзбекистон Республикаси МЖтКнинг 54-моддаси 1-қисмида назарда тутилган ҳуқуқбузарликни содир этганлиги юзасидан тузилган баённомаларни келгусида Г.Б ва Т.М.лардан пора олиш мақсадида кирим қилмасдан, Г.Б ва Т.М.лар билан алоқага киришиб, улардан маъмурий жарима қўлламаслик эвазига 800.000 сўм пулларни пора тариқасида талаб қилиб, шундан тезкор тадбирда Г.Б ва Т.М.лардан 600.000 сўмни пора тариқасида олган вақтида ашёвий далиллар билан ушланган.

Суд, судланувчи Ж.Снинг содир этган қилмиши унча оғир бўлмаган жиноятлар туркумига кириши, у пенсия ёшида эканлиги, ЖКнинг 50-моддасида ёшга доир пенсияга чиқиш ҳуқуқига эга бўлган шахсларга озодликдан маҳрум қилиш билан боғлиқ жазо тайинлаб бўлмаслиги сабабли Ж.С.га ЖКнинг 210-моддаси 1-қисми билан моддий жавобгарлик ва мансабдорлик вазифаларида ишлаш ҳуқуқидан 1 йил муддатга маҳрум қилиб, 2 йил озодликни чеклаш жазоси тайинлаган.

Хулоса ўрнида шуни таъкидлаш жоизки, коррупцияга қарши курашиш-долзарб вазифа эканлигини ҳеч биримиз унутмаслигимиз керак. Бу борада барчамиздан бирдек масъулият талаб этилади. Шундагина мамлакатимиз янада тараққий этиб, халқимиз фаровонлиги ошиб бораверади.

Фозил Юсупов, Қашқадарё вилоят судининг жиноят ишлари бўйича судьяси

Қашқадарё вилоят судлари судьялари, ходимлари ва суд фахрийлари иштирокида “Конституция – бахтимиз қомуси” деб номланган тантанали байрам тадбири бўлиб ўтди

Ўзбекистон Республикаси Конституцияси қабул қилинганининг 29 йиллиги муносабати билан Қашқадарё вилоят судлари судьялари, ходимлари ва суд фахрийлари иштирокида бўлиб ўтган тантанали байрам тадбири “Конституция – бахтимиз қомуси” деб номланди. Дастлаб тадбирни Қашқадарё вилоят судининг раиси Абдуқаюм Маҳкамов кириш сўзи билан очиб берди. Коституциямизнинг ҳаётимизда тутган ўрни ва яратилиш тарихи ҳақида гапирар экан, ўтган қисқа даврда жамиятимизнинг сиёсий-ҳуқуқий ва ижтимоий-иқтисодий қиёфаси, одамларимизнинг дунёқараши бутунлай ўзгаргани, ҳар бир юртдошимиз мамлакатимизнинг тараққиётига муносиб ҳисса қўшаётгани Бош Қомусимизнинг ҳаётбахш қудрати ва улкан салоҳияти сабабли эканлигини таъкидлаб ўтди.

Тадбирда сўз олган суд фахрийлари ва судьялар Конституцияда энг аввало, ўзбек миллатининг тарихий анъаналари ва тафаккури ўз аксини топганлигини таъкидлаб ўтишди.

Ўзбекистон Республикаси Конституцияси инсонларга муайян ҳуқуқлар ва эркинликлар бериш билан бирга уларни амалга ошириш учун зарур бўлган иқтисодий, сиёсий ва ҳуқуқий кафолатлар билан таъминлайди. Давлат фуқароларнинг ҳуқуқ ва эркинликларини таъминлаш вазифасини ўзининг турли идораларига юклайди. Хусусан, ҳуқуқни мухофаза қилувчи идоралар ҳисобланган суд, прокуратура, ички ишлар ва бошқа органларнинг асосий вазифаси ҳам фуқароларнинг хуқуқ ва эркинликларини муҳофаза қилишдир. Шу боисдан ҳам Конституциямизнинг 44-моддасида ҳар бир шахснинг ўз хуқуқ ва эркинликларини суд орқали химоя қилиш, давлат идоралари, мансабдор шахслар, жамоат бирлашмаларининг ғайриқонуний ҳатти-ҳаракатлари устидан судга шикоят қилиш хуқуқи мавжудлиги баён этилган. Шу қаторда таъкидлаш ўринлики, Конституциямизнинг 22-бобида Ўзбекистон Республикасининг суд ҳокимияти хусусида батафсил тўхталиб ўтилган.

Тадбир давомида Ўзбекистон Республикаси Конституцияси Қабул қилинганининг 29 йиллиги байрами муносабати билан ҳамда мамлакатимизда суд-ҳуқуқ соҳасида изчил амалга оширилаётган ислоҳотлардаги фаол иштироки, жамиятда ҳуқуқий маданиятни юксалтириш борасидаги ҳуқуқий тарғибот ишларига қўшган салмоқли ҳиссаси ва меҳнат фаолиятидаги ютуқлари учун бир қатор судьялар ва суд ходимлари фахрий ёрлиқ ва эсдалик совғалари билан тақдирланди.

Абдулла Орипов ижод мактабининг ижодкор ўқувчилари томонидан ўқиб берилган Конституциямиз ва Ватан ҳақидаги шеърлар тадбир иштирокчиларида катта таассурот қолдирган бўлса, вилоятнинг истеъдодли санъаткорлари томонидан ижро этилган Бош Қомусимизни ва жаннатмакон диёримизни тараннум этувчи куй-қўшиқлар тадбирга кўтаринки руҳ бағишлади.

Қашқадарё вилоят суди жамоатчилик ва ОАВ билан алоқалар бўлими

Судья талабалар билан учрашди

Жиноят ишлари бўйича Қарши шаҳар судининг судьяси Шавкат Нурматов томонидан Қашқадарё юридик техникумида “Коррупция – ривожланишимизга тўсиқ” мавзусида учрашув ташкил этилди. Тадбирда коррупция жамиятимиз ривожи учун хатарли иллат эканлиги, коррупцияга қарши курашиш – бутун бир миллат зиммасидаги масъулият эканлигини англаб, миллий давлатчилигимиз равнақи учун барча сидқидилдан меҳнат қилиш лозимлиги таъкидлаб ўтилди.

Тадбир давомида бошқа ҳуқуқий мазуларда ҳам қизғин суҳбат бўлиб ўтди. Талабалар ўзларини қизиқтирган саволларига жавоб олишди.

Қашқадарё вилоят суди жамоатчилик ва ОАВ билан алоқалар бўлими

Жиноят ишлари бўйича судьялар тиббиёт ходимлари иштирокида давра суҳбати ўтказишди

Қашқадарё вилоят суди жиноят ишлари бўйича судлов ҳайъати судьяси Фаррух Ниязов ҳамда жиноят ишлари бўйича Қарши шаҳар суди раиси Анвар Элмуродовлар томонидан Қарши шаҳар 1-сонли оилавий поликлиникасида “Коррупция –ривожланишимизга тўсиқ” мавзусида, “Кучли таъсир қилувчи ёки заҳарли моддаларни қонунга хилоф равишда муомалага киритиш билан боғлиқ” жиноят тушунчаси ва унга тайинланадиган жазо турлари ва бошқа мавзуларда давра суҳбати ўтказилди.

Унда поликлиника шифокорлари ва ходимлари иштирок этишди. Иштирокчиларни қизиқтирган саволларга судьялар батафсил жавоб беришди.

Қашқадарё вилоят суди жамоатчилик ва ОАВ билан алоқалар бўлими