“Коррупция – жамият кушандаси”

Инсон умри давомида жамиятда ижтимоий фойдали фаолият билан шуғулланар экан, бу жараёнда унинг шахсий манфаатлари билан халқ манфаатлари тўқнаш келиши табиий ҳолдир. Бундай вазиятда миллат келажагини, давлат ва жамият манфаатларини ҳамда виждонини ўзининг нафсидан, мол-дунёга бўлган ҳою-ҳавасларидан, ўз манфаатларидан устун қўймай туриб, Ватан равнақига ҳисса қўшиб бўлмайди. Бунинг учун инсонда юксак маънавият ва унинг негизида юксак ҳуқуқий маданият шаклланган бўлиши керак.

Қашқадарё вилоят суди иқтисодий ишлар бўйича судлов ҳайъати судьялари Давлат Раҳимов ва Жамшид Ҳусайиновларнинг ҳам Қарши шаҳри Ойдин маҳалла фуқаролар йиғинида “Коррупция – жамият кушандаси” мавзусида ўтказган давра суҳбатидан кўзланган мақсад ҳам аввало аҳолининг ҳуқуқий маданиятини оширишдан иборат. Ўтказилган давра суҳбатида маҳалла фаоллари ва фуқаролар иштирок этишди. Қизғин тарзда ўтган давра суҳбатида иштирокчилар ўзларини қизиқтирган саволлларга жавоб олишди.

 

Қашқадарё вилоят суди жамоатчилик ва ОАВ билан алоқалар бўлими

Ёш ҳуқуқшунослар билан учрашув

Қашқадарё вилоят суди жиноят ишлари бўйича судлов ҳайъати судьялари Ш.Бахтиёров, Ш.Ражабов, Ф.Юсупов ва Н.Абдуллаевлар Қарши шаҳридаги юридик техникуми талабалари билан учрашув ўтказдилар.

Учрашувда, судьялар томонидан коррупциявий жиноятлар, коррупцияга қарши курашиш борасида қабул қилинган Фармон, қарорлар, Ўзбекистон Республикаси “Судлар тўғрисида”ги Қонунининг мазмун моҳияти, судлар томонидан жиноят ва маъмурий ҳуқуқбузарликка доир ишларни биринчи, апелляция ва кассация инстанцияларида кўриб чиқиш тартиби ва шартлари, судьялик лавозимига номзодга қўйиладиган талаблар, судьялик лавозимига сайланадиган, тайинланадиган шахсларга қўйиладиган талаблар, судьяларни сайлаш ва тайинлаш тартиби ва судьяларнинг одоб-ахлоқ кодексида белгиланган талаблар юзидан маърузалар қилинди.

Учрашув очиқ мулоқот шаклида олиб борилиб, талабалар томонидан берилган саволларга судьялар батафсил жавоблар беришди. Қизиқарли ўтган бу каби учрашувларни келгусида янада давом эттиришга келишиб олинди.

 

Қашқадарё вилоят суди жамоатчилик ва ОАВ билан алоқалар бўлими

Коррупцияга қарши кураш – давр талаби

Давлат кадастрлар палатаси Қашқадарё вилоят бошқармаси Қарши шаҳар филиалида Қашқадарё вилоят суди жиноят ишлари бўйича судлов ҳайъати томонидан давра суҳбати ташкил қилинди.

Учрашувда иштирок этган вилоят судининг жиноят ишлари бўйича судьялари Ф.Ниязов, Ш.Бахтиёров, Ф.Юсупов ва Б.Турдиевлар коррупциявий жиноятлар, коррупцияга қарши курашиш борасида қабул қилинган Фармон, қарорлар, фирибгарлик билан боғлиқ жиноят ишлари бўйича жавобгарлик, жиноятларнинг келиб чиқишига шарт-шароит яратиб бераётган омиллар ва ижтимоий муносабатлар, Ўзбекистон Республикаси Жиноят кодексининг 210-212-моддаларида назарда тутилган жиноятлари ва улар учун жавобгарлик ҳамда жазо тизими ҳамда жисмоний ва юридик шахсларга ер майдонлари ажратилиши, кўчмас мулкларга нисбатан мулк ҳуқуқи ва бошқа ҳуқуқларнинг берилиши билан боғлиқ қонунчилик нормалари ҳақида маърузалар қилиниб, учрашув иштирокчиларини қизиқтирган саволларга жавоблар берилди.

Келгусида бу каби учрашувларни мунтазам равишда ўтказиб бориш борасидаги таклифлар маъқулланиб, учрашувлар янада самарали бўлишига эришиш мақсадида ҳамкорликни кучайтиришга келишиб олинди.

 

Қашқадарё вилоят суди жамоатчилик ва ОАВ билан алоқалар бўлими

 

“Банкротлик ишлари мавзусида” давра суҳбати ўтказилди

Косон туманларо иқтисодий суди судьяси Абдулла Сафаров иштирокида Косон туман Давлат солиқ инспекцияси биносида “Банкротлик ишлари мавзусида” давра суҳбати ўтказилди. Тадбирда Абдулла Сафаров томонидан Ўзбекистон Республикасининг “2022 йил учун Ўзбекистон Республикасининг давлат бюджети тўғрисида”ги Қонуни ижросини таъминлаш чора-тадбирлари тўғрисида”ги 73-сонли Қарори бўйича солиқ органлари томонидан солиқ турлари бўйича даромадлар прогнозининг ошириб бажарилган қисми Қорақалпоғистон Республикаси Республика бюджети, вилоятлар бюджетлари ва Тошкент шаҳрининг шаҳар бюджетида жисмоний шахслардан олинадиган даромад солиғи, фойда солиғи, қўшилган қиймат солиғи бўйича даромадлар прогнозининг ошириб бажарилган қисми тўлиқ ҳажмда қолдирилиши бўйича тушунтиришлар ва мазкур Қарор ижроси бўйича солиқ хизмати органлари томонидан эътибор берилиши лозим бўлган ҳолатлар юзасидан фикрлар билан билдирилди.

Шу билан бирга давлат солиқ инспекцияси ходимларига Ўзбекистон Республикаси Олий суди раисининг ўринбосари ва Ўзбекистон Республикаси Давлат солиқ қўмитасининг ўринбосари томонидан 2022 йил 7 февралда имзоланган қўшма кўрсатма юзасидан солиқ органлари томонидан судларга банкротликнинг соддалаштирилган тартибида даъво аризаси киритилганда амалга ошириши лозим бўлган ҳолатлар бўйича ўз тушунтиришларини берди. Тадбир савол ва жавобларга бой тарзда ўтди.

 

Қашқадарё вилоят суди жамоатчилик ва ОАВ билан алоқалар бўлими

Ёшлар коррупцияга қарши

Қарши шаҳридаги Ўзбекистон Республикаси Ички ишлар вазирлиги академик лицейида “Ёшлар коррупцияга қарши” мавзусида йиғилиш бўлиб ўтди. Унда Қашқадарё вилоят суди жиноят судлов ҳайъати судьялари, лицей ўқитувчилари ва ўқувчилари иштирок этди. Тадбирни академик лицей директори подполковник М.Дўстёров очди. Тадбирда ҳозирги кунда мамлакатимизда суд ҳуқуқ тизимидаги ислоҳотлар, ёшлар ўртасида рўй бераётган ҳуқуқбузарликларнинг турли кўринишлари, безорилик, ўғрилик ҳақида, шунингдек, жамиятимизда юз бераётган бошқа жиноятлар ҳақида иштирокчиларга Қашқадарё вилоят суди жиноят судлов ҳайъати судьялари Фаррух Ниёзов ва Шаҳзод Бахтиёровлар маъруза қилишди.

Бундан ташқари учрашувда жамиятда жиноятчиликнинг олдини олиш ва унга қарши курашиш мақсадида ёшлар ўртасида ҳуқуқни муҳофаза қилиш органлари ходимлари томонидан амалга оширилаётган амалий ишлар тўғрисида ҳам фикр юритилди. Очиқ мулоқот руҳида ўтган йиғилишда давр муаммоси бўлган коррупцияга қарши кураш ва ёшлар ўртасида жиноятчиликнинг олдини олиш мавзусида ўқувчилар томонидан берилган саволларга судьялар батафсил жавоблар беришди.

 

Қашқадарё вилоят суди жамоатчилик ва ОАВ билан алоқалар бўлими

Суд раислари ва ўринбосарлари Шаҳрисабз шаҳрида сайёр қабул ўтказишди

Жиноят ва ҳуқуқбузарликларнинг олдини олиш, аҳолининг ҳуқуқий мавзудаги мурожаатларига ечим излашга қаратилган ишларни жонлантириш мақсадида Қашқадарё вилоят суд органлари масъуллари томонидан 2022 йилда ҳам олис қишлоқ, маҳалла ва овулларда сайёр қабуллар ташкил этиш бошланди. Қашқадарё вилоят судлари масъуллари иштирокидаги илк сайёр қабул Шаҳрисабз шаҳрида ўтказилди. Унда Қашқадарё вилоят суди раиси Абдуқаюм Маҳкамов, Қашқадарё вилоят маъмурий суди раиси Холис Муҳаммедов ва Қашқадарё вилоят суди раиси ўринбосарлари иштирок этишди.

Ташкил этилган сайёр қабулда суд қарорлари ва ажримлари билан боғлиқ бўлган ҳамда турли ижтимоий-иқтисодий масалаларда ҳуқуқий маслаҳат ва кўмак сўраб келган 13 нафар фуқароларнинг мурожаатлари тингланди. Ҳар бир мурожаат суд масъуллари томонидан атрофлича ўрганилди. Мурожаатлар назоратга олиниб, кўмак сўраб келган фуқароларга ҳуқуқий маслаҳатлар берилди.

Сайёр қабул доирасида ўтказилган сайёр суд мажлисида Шаҳрисабз шаҳар ИИБ томонидан берилган 2 нафар маҳкумнинг ўталмай қолган жазосидан муддатидан илгари шартли равишда озод қилиш ҳақидаги тақдимномаси кўриб чиқилди ва мазкур фуқаролар жиноят ишлари бўйича Шаҳрисабз шаҳар суди томонидан муддатидан илгари шартли равишда озод этилди.

 

Қашқадарё вилоят суди жамоатчилик ва ОАВ билан алоқлар бўлими

Қашқадарё вилоят судида семинар ташкил этилди

Бугунги кунда илм, фан ва технологияларнинг жадал ривожланаётгани натижасида одамлар ўртасидаги ижтимоий муносабатларнинг турлари ва доираси кенгаймоқда. Жиноий-ҳуқуқий муносабатлар ҳам бундан мустасно эмас. Бинобарин, жиноятларни фош этиш, тергов қилиш ва судда кўриб чиқиш тартибини ҳам ислоҳ қилиш зарурати туғилаяпти.

Мамлакатимизда ҳам сўнгги йилларда жиноят ишларини юритишнинг анъанавий шаклларидан воз кечилиб, иш юритишни дифференциялаштиришга катта эътибор қаратилмоқда.

Қашқадарё вилоят судининг ташаббуси билан “Айбга иқрорлик тўғрисидаги келишув” ва “Дастлабки эшитув” институтларини қўллаш ҳамда Ўзбекистон Республикаси Олий суди Пленумининг 2021 йил 27 ноябрдаги “Терроризм ва экстремизмни молиялаштиришга оид жиноят ишлари бўйича суд амалиётининг айрим масалалари тўғрисида”ги Қарори мазмун-моҳияти юзасидан видеоконференцалоқа режимида семинар ташкил қилинди.

Семинарда прокуратура, суриштирув ва тергов органлари вакиллари ҳамда адвокатлар иштирок этишди.

2021 йил 18 февралда «Ўзбекистон Республикасининг Жиноят ҳамда Жиноят-процессуал кодексларига ўзгартиш ва қўшимчалар киритиш тўғрисида»ги 675-сонли Қонуни билан Жиноят-процессуал кодексига айбга иқрорлик тўғрисидаги келишув институти 62¹-боб сифатида ва “Дастлабки эшитув” институти 491-боб сифатида киритилди.

Семинарда, вилоят суди жиноят ишлари бўйича судлов ҳайъати томонидан мазкур институтларини қўллаш бўйича ўтган даврда суд амалиёти умумлаштирилганлиги ва таҳлил натижаларида аниқланган ҳолатлар сарҳисоб қилинди. Бу борада, йўл қўйилаётган хатоликлар, ушбу институтларни самарали қўллаш, вужудга келаётган муаммоалар ҳамда уларнинг ечими бўйича фикрлар билдирилди. Суриштирув, тергов органлари ва адвокатлар томонидан бу борада билдирилган фикрлар, таклифлар эшитилиб, савол-жавоб руҳида давом эттирилди.

Бундан ташқари, Ўзбекистон Республикаси Олий суди Пленумининг 2021 йил 27 ноябрдаги “Терроризм ва экстремизмни молиялаштиришга оид жиноят ишлари бўйича суд амалиётининг айрим масалалари тўғрисида”ги Қарорининг мазмун-моҳияти юзасидан фикр юритилиб, тергов органи амалиётида вужудга келаётган муаммолар ечими бўйича таклиф, фикр ва мулоҳазалар билдирилди.

Семинардан кўзланган мақсад, фуқароларнинг ҳуқуқий кафолатлари ҳамда ҳуқуқни муҳофаза қилувчи органларнинг амалга ошириши лозим бўлган ҳаракатлари юзасидан аниқ чора-тадбирлар белгилашдан иборат эканлиги таъкидланди.

Семинар якунлари бўйича келгусида ҳуқуқни муҳофаза қилувчи органлар билан ҳамкорликда бу каби семинар машғулотларини мунтазам ташкил қилиш, кун тартибидаги масалаларни ўзаро келишган ҳолда белгилаш, бунда айнан муаммоли масалаларни танлаб олиш ҳақида келишиб олинди.

 

Шаҳзод Бахтиёров, Қашқадарё вилоят суди жиноят ишлари бўйича судьяси

Судьялар ҳуқуқий тарғибот ўтказишди

Косон туманлараро иқтисодий судининг раиси Акром Тўрақулов ва Косон туманлараро иқтисодий судининг судьяси Абдулла Сафаровлар томонидан Косон тумани “Муғжагул” маҳалла фуқаролар йиғинида давра суҳбати ўтказилди.

Унда Ўзбекистон Республикасининг айрим қонун ҳужжатларига киритилган ўзгартириш ва қўшимчалар юзасидан қизғин давра суҳбати амалга оширилди. Йиғилишда иштирок этган фуқароларни қизиқтирган саволлар юзасидан тегишли тартибда тушунтиришлар бериб ўтилди.

 

Қашқадарё вилоят суди жамоатчилик ва ОАВ билан алоқалар бўлими

Маҳаллада давра суҳбати ўтказилди

Жиноят ишлар бўйича Шаҳрисабз туман суди раиси Орзимурод Шукуров томонидан Шаҳрисабз тумани “Шаматон” маҳалла фуқаролар йиғинида “Хотин-қизларга нисбатан зўравонлик жинояти” мавзусида давра суҳбати ўтказилди. Орзимурод Шукуров оила мустаҳкамлиги, аёл маънавияти, аёлларнинг жамиятда тутган ўрни ҳақида тўхталиб ўтар экан, жамиятда эркаклар ва хотин-қизлар тенг ҳуқуқли эканлигини алоҳида таъкидлаб ўтди. Давра суҳбати қизғин баҳс ва мунозарага бой бўлди.

 

Қашқадарё вилоят суди жавоатчилик ва ОАВ билан алоқалар бўлими

Судьялар иштирокида давра суҳбати бўлиб ўтди

Қашқадарё вилоят суди жиноят ишлари бўйича  судьялари Ботирали Диёров ва Фаррух Ниязовлар Қарши шаҳар Халқ таълими бўлими ишчи ходимлари иштирокида давра суҳбати бўлиб ўтди.

Унда судьялар “Коррупция – хавфли иллат” ва “Соғлиққа ва жамоат тартибига қарши, жумладан, безорилик, тан жароҳатлари етказиш ҳамда фирибгарлик ва ўзгалар мулкини талон-тарож қилиш билан боғлиқ жиноятларнинг мазмун-моҳияти, жавобгарликка тортиш асослари ва тартиби” мавзуларида маърузалар қилишди.

 

Қашқадарё вилоят суди жамоатчилик ва ОАВ билан алоқалар бўлими

Skip to content